അരീക്കോട്: കിളിക്കല്ലിങ്ങല്‍ വളവില്‍ അപകടം തുടര്‍ക്കഥയാവുന്നു. അരീക്കോട് - തിരുര്‍ക്കാട് സംസ്ഥാന പാതയില്‍ സൗത്ത് പുത്തലം കിളിക്കല്ലിങ്ങല്‍ വളവിലാണ് അപകടം പതിവായിരിക്കുന്നത്. കഴിഞ്ഞ ഒരു മാസത്തിനുള്ളില്‍ മാത്രമായി പതിനാല് വാഹനങ്ങളാണിവിടെ അപകടത്തില്‍പ്പെട്ടത്.
കുത്തനെയുള്ള ഇറക്കവും കൊടുംവളവുമാണ് അപകടങ്ങള്‍ക്ക് കാരണം. കഴിഞ്ഞ ദിവസം അര്‍ധരാത്രി ഒന്നിന് ഒരു ചരക്ക് ലോറിയും ഇവിടെ അപകടത്തില്‍പ്പെട്ടിട്ടുണ്ട്. റോഡ് നിര്‍മാണത്തിലെ അശാസ്ത്രീയത ചൂണ്ടിക്കാട്ടി അരീക്കോട് പഞ്ചായത്തധികൃതര്‍ പൊതുമരാമത്ത് വകുപ്പിന് പരാതികള്‍ നല്‍കിയിട്ടുണ്ടെങ്കിലും ഫലമുണ്ടായില്ല. അപകടം പതിവായ ഇവിടെ വേണ്ട രീതിയില്‍ സൂചനാ ബോര്‍ഡ് സ്ഥാപിക്കാന്‍ പോലും അധികൃതര്‍ തയ്യാറായിട്ടില്ല.
രാത്രി കാലങ്ങളിലാണ് ഏറെയും അപകടം ഉണ്ടാവുന്നത് എന്നതിനാല്‍ പലര്‍ക്കും ചികത്സയും വൈകുകയാണ്. ഇതിന് പുറമെ പരിസര വാസികള്‍ ഏത് സമയവും അപകടം കാത്ത് കഴിയേണ്ട അവസ്ഥയിലുമാണ്.
റോഡിന്റെ വളവും കുത്തനെയുള്ള ഇറക്കവും ഒഴിവാക്കി റോഡ് നിര്‍മാണം നടത്തിയെങ്കില്‍ മാത്രമെ ഇവിടെ അപകടങ്ങള്‍ ഇല്ലാതാവുകയൊള്ളു. ഈ രീതിയില്‍ റോഡ് നിര്‍മാണത്തിന് ഭൂമി ആവശ്യമായി വന്നാല്‍ അതുമായി സഹകരിക്കാന്‍ പ്രദേശവാസികള്‍ തയ്യാറാണെന്ന് വാര്‍ഡ് അംഗം ശിഹാബുദ്ധീന്‍ പാറക്കല്‍ സുപ്രഭാതത്തോട് പറഞ്ഞു.