തിരുവനന്തപുരം: കേരളാ കോണ്‍ഗ്രസ് മാണി വിഭാഗവുമായി രാഷ്ട്രീയ സഖ്യമുണ്ടാക്കാന്‍ ഉദ്ദേശിക്കുന്നില്ലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. ശത്രുചേരിയിലെ രാഷ്ട്രീയ ഭിന്നത ഉപയോഗപ്പെടുത്തുക മാത്രമാണ് കോട്ടയം ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പില്‍ ചെയ്തത്.
കോട്ടയത്തേത് പ്രാദേശിക വിഷയം മാത്രമാണ്. കേരളാ കോണ്‍ഗ്രസ് സ്ഥാനാര്‍ഥിക്ക് പിന്തുണ നല്‍കാനുള്ള തീരുമാനമെടുത്തത് സി.പി.എം ജില്ലാ കമ്മിറ്റിയാണ്. ഈ നിലപാട് ശരിവയ്ക്കുന്നതാണ് കേരളാ കോണ്‍ഗ്രസ് നേടിയ വിജയം. യു.ഡി.എഫ് അതിന്റെ ശക്തികേന്ദ്രമായ കോട്ടയത്ത് ഇതുവഴി തകര്‍ന്നിരിക്കുകയാണ്. യു.ഡി.എഫിനെ ശിഥിലമാക്കാന്‍ കിട്ടുന്ന എല്ലാ അവസരങ്ങളും സി.പി.എം പ്രയോജനപ്പെടുത്തും. അതിന് മാണിയെ ഇടതുമുന്നണിയില്‍ എടുക്കുന്നു എന്നോ മുന്നണി വിപുലീകരിക്കുന്നു എന്നോ വ്യാഖ്യാനിക്കേണ്ട. സി.പി.ഐ നേതാവ് പന്ന്യന്‍ രവീന്ദ്രന്‍ നടത്തിയ പ്രസ്താവന തെറ്റിദ്ധാരണ മൂലമായിരിക്കുമെന്നും കോടിയേരി പറഞ്ഞു.