ന്യൂഡല്‍ഹി: പശ്ചിമബംഗാള്‍ മുഖ്യമന്ത്രി മമതാ ബാനര്‍ജിയുടെ മോര്‍ഫ് ചെയ്ത ചിത്രങ്ങള്‍ സോഷ്യല്‍ മീഡിയയിലൂടെ പ്രചരിപ്പിച്ച കേസില്‍ അറസ്റ്റിലായ യുവമോര്‍ച്ച നേതാവ് പ്രിയങ്കാ ശര്‍മ്മയെ മോചിപ്പിക്കാന്‍ സുപ്രിംകോടതി അവധിക്കാല ബെഞ്ച് നിര്‍ദേശം നല്‍കി.
ജയിലില്‍ നിന്ന് ഇറങ്ങിയാലുടന്‍ മാപ്പപേക്ഷ എഴുതി നല്‍കണം. തുടക്കത്തില്‍ ആദ്യം മാപ്പു പറയാന്‍ ആവശ്യപ്പെട്ട ഇന്ദിരാ ബാനര്‍ജിയും സഞ്ജീവ് ഖന്നയുമടങ്ങുന്ന അവധിക്കാല ബെഞ്ച് പിന്നീട് അത് ഒഴിവാക്കി ജയിലില്‍ നിന്ന് ഇറങ്ങിയ ശേഷം മാപ്പു പറയാന്‍ നിര്‍ദേശിച്ചു.
അറസ്റ്റ് ചെയ്യുന്നതിനു മുന്‍പുതന്നെ പ്രിയങ്ക പോസ്റ്റ് ഡിലീറ്റ് ചെയ്തിരുന്നുവെന്ന് പ്രിയങ്കയുടെ അഭിഭാഷകന്‍ എന്‍.കെ കൗള്‍ വാദിച്ചു. അവര്‍ മാത്രമല്ല പോസ്റ്റ് പ്രചരിപ്പിച്ചത്. എന്നിട്ടും അറസ്റ്റ് ചെയതത് അവരെ മാത്രമാണ്.

ഇത് ആവിഷ്‌ക്കാര സ്വാതന്ത്ര്യത്തിന്റെ ലംഘനമാണെന്നും കൗള്‍ വാദിച്ചു. എന്നാല്‍ ഒരു രാഷ്ട്രീയപാര്‍ട്ടിയുടെ നേതാവ് തന്നെ ഇങ്ങനെ ചെയ്യുന്നത് ശരിയല്ലെന്നും സാധാരണക്കാരനായിരുന്നെങ്കില്‍ വിട്ടുകളയാമായിരുന്നെന്നായിരുന്നു ജസ്റ്റിസ് ഖന്നയുടെ മറുപടി. മാപ്പു പറയുകയാണെങ്കില്‍ ജാമ്യം അനുവദിക്കാമെന്നായി കോടതി. എന്നാല്‍ മാപ്പു പറയുന്നത് ഇത്തരം കേസുകളില്‍ കീഴ് വഴക്കമാകുമെന്ന് കൗള്‍ വാദിച്ചു.
തുടര്‍ന്ന് ജാമ്യം നല്‍കാമെന്നും ഇറങ്ങിയാലുടന്‍ മാപ്പു പറയാനും കോടതി ഉത്തവിടുകയായിരുന്നു.
ന്യൂയോര്‍ക്കില്‍ നടന്ന ഒരു ചടങ്ങില്‍ പങ്കെടുക്കുന്ന പ്രിയങ്ക ചോപ്രയുടെ അര്‍ദ്ധ നഗ്ന ചിത്രം മോര്‍ഫ് ചെയ്ത് അതില്‍ മമതാ ബാനര്‍ജിയുടെ മുഖം ഒട്ടിച്ചു ചേര്‍ത്തുവെന്നതാണ് കേസ്.