സ്വന്തം ലേഖകന്‍
കൊണ്ടോട്ടി: സ്ഥാനാര്‍ഥിക്കുപ്പായം തുന്നിയവര്‍ക്ക് തങ്ങളുടെ വാര്‍ഡുകളില്‍ മത്സരിക്കാന്‍ ഇടം ലഭിക്കുമോ എന്ന് അറിയിച്ച് തദ്ദേശ സ്ഥാപനങ്ങളിലേക്കുളള സംവരണ വാര്‍ഡ് നറുക്കെടുപ്പിന് ഇന്നുമുതല്‍ തുടക്കമാവും.
50 ശതമാനം വനിതാ സംവരണത്തോടെ തദ്ദേശ സ്ഥാപനങ്ങളിലെ വാര്‍ഡ് സംവരണ നറുക്കെടുപ്പ് ഇന്നുമുതല്‍ അടുത്ത മാസം ആറ് വരെയുളള ദിവസങ്ങളിലായാണ് കലക്ടറേറ്റുകളില്‍ ക്രമീകരിച്ചിരിക്കുന്നത്.
സംസ്ഥാനത്തെ 1200 തദ്ദേശ സ്ഥാപനങ്ങളില്‍ ആകെ 21,900 വാര്‍ഡുകളിലാണ് നറുക്കെടുപ്പ് നടത്തുന്നത്. ഇവയില്‍ 12,738 വാര്‍ഡുകളും സംവരണ വാര്‍ഡുകളാണ്. ശേഷിക്കുന്ന 9,162 ജനറല്‍ വാര്‍ഡുകളാവും.
നിലവിലെ വനിതാ വാര്‍ഡുകള്‍ മുഴുവന്‍ ജനറലിലേക്ക് മാറ്റിയാവും നറുക്കെടുക്കുക. എന്നാല്‍ പട്ടികജാതി, പട്ടിക വര്‍ഗ സംവരണവും ഇതില്‍ വനികളും വരുന്നതോടെ ഓരോ വാര്‍ഡിന്റെയും ഗതി നറുക്കെടുപ്പിന് ശേഷമായിരിക്കും വ്യക്തമാവുക.