ചെറുതുരുത്തി: എസ്.എസ്.എല്‍.സി പരീക്ഷയില്‍ നൂറ് ശതമാനം വിജയം നേടിയ പാഞ്ഞാള്‍ ഗവണ്‍മെന്റ് ഹൈസ്‌കൂളിന് ത്രിമധുരം പകര്‍ന്ന് മൂന്ന് സഹോദരങ്ങളുടെ വിജയം.  കിള്ളിമംഗലത്ത് ബേക്കറി വ്യാപാരം നടത്തുന്ന ഉണ്ണികൃഷ്ണന്‍- ഭാഗ്യലക്ഷ്മി ദമ്പതികളുടെ മക്കളായ അജിത്ത്കൃഷ്ണ,  അഞ്ജലി, അനീഷ എന്നിവരാണ് ജീവിതവഴിയില്‍ എസ്.എസ്.എല്‍.സി പരീക്ഷയുടെ കടമ്പയും ഒരുമിച്ച്  കടന്നത്.
എട്ടാം ക്ലാസ് മുതലാണ്  ഇവര്‍ പാഞ്ഞാള്‍ സ്‌കൂളില്‍ ഒരുമിച്ചെത്തിയത് അതു വരെ കിള്ളിമംഗലം സ്‌കൂളിലായിരുന്നു പഠനം. അജിത്ത് കൃഷ്ണ ഒന്‍പത് എപ്ലസും, ഒരു ബി പ്ലസും നേടിയപ്പോള്‍, അഞ്ജലി 8 എ പ്ലസും, 2 ബി പ്ലസും, കരസ്ഥമാക്കി. അനീഷ ആറ് എ പ്ലസും, ഒരു എയും, രണ്ട് ബി പ്ലസും കരസ്ഥമാക്കി.  വിജയം നേടിയ ത്രിമൂര്‍ത്തികളെ സ്‌കൂള്‍ അധികൃതരും, അധ്യാപകരും പ്രത്യേകം അഭിനന്ദിച്ചു.