മണ്ണാര്‍ക്കാട്: തെങ്കര പഞ്ചായത്തിലെ ആനമൂളിയില്‍ സ്വകാര്യ വ്യക്തിയുടെ കെട്ടിടത്തിലേക്ക് ബിവറേജസ് ഔട്ട്‌ലെറ്റ് മാറ്റിസ്ഥാപിക്കാനുളള ശ്രമം നാട്ടുകാര്‍ തടഞ്ഞു. ശനിയാഴ്ച ഉച്ചക്ക് 12മണിയോടെയാണ് ആനമൂളിയില്‍ ജനകീയ പ്രതിഷേധമുണ്ടായത്. സ്വകാര്യ വ്യക്തിയുടെ തോട്ടത്തില്‍ സ്ഥിതി ചെയ്യുന്ന കെട്ടിടത്തില്‍ ഔട്ട്‌ലറ്റ് സ്ഥാപിക്കുന്നതിന്റെ ഭാഗമായി മദ്യകുപ്പികളുമായെത്തിയ വാഹനത്തെ നാട്ടുകാര്‍ ചേര്‍ന്ന് തടയുകയായിരുന്നു. പ്രശ്‌നം രൂക്ഷമായതിനെ തുടര്‍ന്ന് മണ്ണാര്‍ക്കാട് സി.ഐ ഹിദായത്തുല്ല മാമ്പ്ര, എസ്.ഐമാരായ ഷിജു എബ്രഹാം, മുരളീധരന്‍ എന്നിവരുടെ നേതൃത്വത്തില്‍ പൊലീസ് സ്ഥലത്തെത്തി. തുടര്‍ന്ന് പ്രതിഷേധക്കാരുമായി ചര്‍ച്ച നടത്തിയെങ്കിലും ഒരു കാരണവശാലും മദ്യം ഇറക്കാന്‍ അനുവദിക്കില്ലെന്ന നിലപാടില്‍ നാട്ടുകാര്‍ ഉറച്ചുനിന്നു. തുടര്‍ന്ന് പൊലീസ് പ്രതിഷേധക്കാരെ അറസ്റ്റ്  ചെയ്ത് നീക്കുകയയും മദ്യലോഡുമായി വന്ന ലോറിയെ പൊലീസ് സ്റ്റേഷനിലേക്ക് മാറ്റുകയും ചെയ്തു. പിന്നീട് ജനപ്രതിനികളായ ടി.കെ ഫൈസല്‍, ഹംസ എന്നിവരുടെ നേതൃത്വത്തില്‍ സ്റ്റേഷനിലെത്തി പൊലീസ് കസ്റ്റഡിയിലെടുത്തവരെ ജാമ്യത്തിലിറക്കി. ഒരു കാരണവശാലും പ്രദേശത്ത് മദ്യവില്‍പ്പന ശാല തുടങ്ങാന്‍ അനുവദിക്കില്ലെന്ന് ജനപ്രതിനിധികളും, നാട്ടുകാരും പറഞ്ഞു.