പാപ്പിനിശ്ശേരി: മോഷണ കേസുകളില്‍ അറസ്റ്റിലായ ശേഷം ജാമ്യത്തില്‍ ഇറങ്ങി വിദേശത്തേക്ക് കടന്ന പ്രതി 21 വര്‍ഷത്തിനു ശേഷം വീണ്ടും പിടിയിലായി. പാപ്പിനിശ്ശേരി സ്വദേശി സാജിദ് (45) ആണ് 21 വര്‍ഷത്തിന് ശേഷം വീണ്ടും വളപട്ടണം പൊലിസിന്റെ പിടിയിലായത്. 1997 ലാണ് നിരവധി മോഷണം നടത്തിയ കേസില്‍ സാജിദിനെ പൊലിസ് പിടികൂടിയത്. വിദേശത്ത് നിന്നു നാട്ടിലെത്തിയ ശേഷം എറണാകുളത്തും മറ്റു സ്ഥലങ്ങളിലും ഒളിച്ചുതാമസിച്ച പ്രതി ബുധനാഴ്ചയാണ് നാട്ടിലെത്തിയത്. വളപട്ടണം സി.ഐ എം. കൃഷ്ണന്റെ പ്രത്യേക നിര്‍ദേശപ്രകാരം എത്തിയ എസ്.ഐ സി.സി റനീഷ്, എ.എസ്.ഐ കെ. പ്രസാദ് എന്നിവരുടെ നേതൃത്വത്തിലുള്ള സംഘമാണ് പാപ്പിനിശ്ശേരി ഇല്ലിപ്പുറത്ത് വച്ച് സാജിദിനെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.