തിരുവനന്തപുരം : എറണാകുളം അങ്കമാലി, തൃശൂര്‍ വടക്കാഞ്ചേരി സെക്ഷനുകള്‍ക്കിടയില്‍ റെയില്‍പ്പാത നവീകരണ പ്രവൃത്തി നടക്കുന്നതിനാല്‍ ഇതു വഴിയുള്ള ട്രെയിന്‍ ഗതാഗതത്തില്‍ നിയന്ത്രണങ്ങളേര്‍പ്പെടുത്തി. എറണാകുളം - ഗുരുവായൂര്‍ പാസഞ്ചര്‍ (56370), ഗുരുവായൂര്‍ - എറണാകുളം പാസഞ്ചര്‍ (56375) എന്നിവയുടെ ഈ മാസം 18 മുതല്‍ 20 വരെയുള്ള സര്‍വിസുകള്‍ പൂര്‍ണമായും റദ്ദാക്കി. കോയമ്പത്തൂര്‍ - തൃശൂര്‍ പാസഞ്ചറും ( 56605) തൃശ്ശൂര്‍ - കണ്ണൂര്‍ പാസഞ്ചറും (56603) 18 മുതല്‍ 22 വരെ തൃശൂരിനും ഷൊര്‍ണ്ണൂരിനുമിടയില്‍ സര്‍വിസ് നടത്തില്ല.

ചെന്നൈ എഗ്മോര്‍ - ഗുരുവായൂര്‍ എക്‌സ്പ്രസ് (16127) 18 മുതല്‍ 22 വരെ എറണാകുളം ജങ്ഷനില്‍ രണ്ട് മണിക്കൂര്‍ നിര്‍ത്തിയിടും. എറണാകുളം - പൂനെ എക്‌സ്പ്രസ് ( 22149) 21 ന് ഒല്ലൂര്‍, തൃശൂര്‍ സ്റ്റേഷനുകളില്‍ 40 മിനിറ്റ് നിര്‍ത്തിയിടും. തിരുവനന്തപുരം സെന്‍ട്രല്‍ - ഹസ്രത് നിസാമുദ്ദീന്‍ സൂപ്പര്‍ ഫാസ്റ്റ് എക്‌സപ്രസ് (22655) 22 ന് തൃശൂര്‍, ഒല്ലൂര്‍ സ്റ്റേഷനുകളില്‍ 40 മിനിറ്റ് നിര്‍ത്തിയിടുമെന്നും റെയില്‍വേ അറിയിച്ചു.