ധാക്ക: എ.എഫ്.സി കപ്പില്‍ ചെന്നൈയിന്‍ എഫ്.സിക്ക് ആദ്യ തോല്‍വി. ഗ്രൂപ്പ് മത്സരത്തില്‍ ബംഗ്ലാദേശ് ക്ലബ് അഭാനി ധാക്കയോടാണ് ചെന്നൈയിന്‍ പരാജയപ്പെട്ടത്. ഒരു ഗോളിന് ലീഡ് നേടിയ ശേഷം 3-2നാണ് ചെന്നൈയിന്‍ എഫ്.സിയുടെ തോല്‍വി.
ആറാം മിനുട്ടില്‍ മലയാളി താരം സി.കെ വിനീതിലൂടെ ലീഡെടുത്ത ചെന്നൈയിന്‍ എഫ്.സിയെ രണ്ടാം പകുതിയില്‍ നേടിയ മൂന്ന് ഗോളുകള്‍ക്കാണ് അഭാനി ധാക്ക മറികടന്നത്. 74ാം മിനുട്ടില്‍ ഇസാക് വാന്‍മല്‍സൗമയിലൂടെ ചെന്നൈയിന്‍ ഒരു ഗോള്‍കൂടി മടക്കിയെങ്കിലും ജയിക്കാന്‍ കഴിഞ്ഞില്ല. 64ാം മിനുട്ടില്‍ കെര്‍വന്‍സ് ബെല്‍ഫോര്‍ട്ട്, 69ാം മിനുട്ടില്‍ മാസിഹ് സൈഗിനി, 88ാം മിനുട്ടില്‍ മമുനുല്‍ ഇസ്‌ലാം എന്നിവര്‍ അഭാനിക്ക് വേണ്ടി ഗോള്‍ കണ്ടെത്തി. ഗ്രൂപ്പില്‍ മുന്‍പ് അഭാനിയുമായി ഏറ്റുമുട്ടിയപ്പോള്‍ 1-0ത്തിന് ചെന്നൈയിന്‍ എഫ്.സിക്കായിരുന്നു വിജയം. തോറ്റെങ്കിലും ഗ്രൂപ്പില്‍ ചെന്നൈ തന്നെയാണ് ഒന്നാമത്. നാല് മത്സരത്തില്‍ രണ്ട് ജയവും ഒരു സമനിലയും ഒരു തോല്‍വിയുമടക്കം ഏഴ് പോയിന്റാണ് ചെന്നൈയിനുള്ളത്. രണ്ടാമതുള്ള അഭാനി ധാക്കക്കും ഏഴു പോയിന്റുണ്ടെങ്കിലും ഗോള്‍ വ്യത്യാസത്തിന്റെ അടിസ്ഥാനത്തിലാണ് ചെന്നൈയിന്‍ മുന്‍പില്‍ നില്‍ക്കുന്നത്.