തേഞ്ഞിപ്പലം: കാലിക്കറ്റ് സര്‍വകലാശാലാ അഫ്‌സലുല്‍ ഉലമ പ്രിലിമിനറി ഫലം വെബ്‌സൈറ്റില്‍ പ്രസിദ്ധീകരിച്ചപ്പോള്‍ വ്യാപകമായ തെറ്റുകളുണ്ടെന്ന പരാതിയുമായി വിദ്യാര്‍ഥികള്‍. പേപ്പറുകളുടെ പേരുകള്‍ റിസള്‍ട്ട് പ്രിന്റ് ഔട്ടില്‍ വന്നിട്ടില്ലെന്നാണ് വിദ്യാര്‍ഥികള്‍ പറയുന്നത്. പല പേപ്പറുകളുടെയും ഗ്രേഡ് രേഖപ്പെടുത്തിയിട്ടില്ല.
ചില പേപ്പറുകളുടെ പേരുകള്‍ ഒന്നിലധികം തവണ വന്നിട്ടുമുണ്ട്. ഉയര്‍ന്ന ഗ്രേഡ് പ്രതീക്ഷിച്ച പല വിദ്യാര്‍ഥികളും താഴ്ന്ന ഗ്രേഡാണ് ലഭിച്ചതെന്ന പരാതിയും ഉന്നയിക്കുന്നുണ്ട്. നിരവധി പേരാണ് പരാതിയുമായി ഇന്നലെ സര്‍വകലാശാലയില്‍ എത്തിയത്. ഫലം എന്റര്‍ ചെയ്തതിലുള്ള പിഴവാണ് ഇത്തരത്തിലൊരു പരാതിക്ക് ഇടയാക്കിയതെന്നാണ് വിലയിരുത്തുന്നത്. കാലിക്കറ്റ്, കേരള യൂനിവേഴ്‌സിറ്റികളില്‍ ഡിഗ്രി പ്രവേശനത്തിന് ഓണ്‍ലൈന്‍ ആയി അപേക്ഷ കൊടുക്കേണ്ട സമയമാണിപ്പോള്‍. പ്ലസ് ടു ഹ്യുമാനിറ്റീസിന് തുല്യമാണ് അഫ്‌സലുല്‍ ഉലമ പ്രിലിമിനറി. അതുകൊണ്ട് തന്നെ ബിരുദ പ്രവേശനത്തെക്കുറിച്ച് ആശങ്കയിലാണ് വിദ്യാര്‍ഥികള്‍.
പ്ലസ് ടു റിസല്‍ട്ട് വന്നതിനാല്‍ പ്രിലിമിനറിയുടെ ഫലവും വേഗത്തില്‍ സൈറ്റില്‍ അപ്‌ലോഡ് ചെയ്തപ്പോള്‍ വന്ന പിഴവുകള്‍ ആയിരിക്കാമെന്നും ഒറിജിനല്‍ ഗ്രേഡ് കാര്‍ഡ് കിട്ടുമ്പോള്‍ ഫലം ശരിയായി ലഭിക്കുമെന്ന പ്രതീക്ഷയിലുമാണ് വിദ്യാര്‍ഥികള്‍.