കയ്പമംഗലം: മതിലകത്ത് ചികിത്സയിലിരിക്കെ നാലര വയസുകാരി മരിച്ചു. ചികിത്സാ പിഴവെന്ന് ആരോപിച്ച് ബന്ധുക്കളും നാട്ടുകാരും ആശുപത്രിക്ക് മുന്നില്‍ കുത്തിയിരിപ്പ് സമരം നടത്തി. പെരിഞ്ഞനം പൊന്മാനിക്കുടം സ്വദേശി കാര്യേഴത്ത് സജീവിന്റെ മകള്‍ ഗൗരി കൃഷ്ണയാണ് മരിച്ചത്.
പനിയും ഛര്‍ദ്ദിയേയും തുടര്‍ന്ന് കുട്ടിയെ വെള്ളിയാഴ്ച ഉച്ചതിരിഞ്ഞ് മൂന്നോടെയാണ് മതിലകം റിലീഫ് ആശുപത്രിയില്‍ പ്രവേശിപ്പിച്ചത്. ഈ സമയത്ത് ഡോക്ടര്‍മാര്‍ ആരും ഡ്യൂട്ടിയില്‍ ഉണ്ടായിരുന്നില്ല. തുടര്‍ന്ന് ആശുപത്രി അധികൃതര്‍ കുട്ടിക്ക് ഡ്രിപ്പ് നല്‍കുകയായിരുന്നു. ഇന്നലെ രാവിലെ ആറോടെ കുട്ടിക്ക് രോഗം മൂര്‍ച്ഛിച്ചതിനെ തുടര്‍ന്ന് അത്യാഹിത വിഭാഗത്തില്‍ വിവരമറിയിച്ചെങ്കിലും ഡോക്ടര്‍ എത്തി പരിശോധിക്കാന്‍ തയ്യാറായില്ലെന്നു കുട്ടിയുടെ പിതാവ് പറഞ്ഞു. പിന്നീട് പത്തോടെ ഡോക്ടറെത്തി കുട്ടിക്ക് ഇഞ്ചക്ഷന്‍ നല്‍കുകയും മറ്റൊരു ആശുപത്രിയിലേക്ക് കൊണ്ടുപോകാന്‍ നിര്‍ദേശിക്കുകയും ചെയ്തു. എന്നാല്‍ പത്തേമുക്കാലോടെ കുട്ടി മരിക്കുകയായിരുന്നു.
സംഭവമറിഞ്ഞ് ബന്ധുക്കളും നാട്ടുകാരും ആശുപത്രിക്ക് മുന്നില്‍ തടിച്ചുകൂടി. ജില്ലാ പൊലിസ് മേധാവി എത്തിയതിനു ശേഷമേ മൃതദേഹം ആശുപത്രിയില്‍ നിന്ന് മാറ്റാന്‍ അനുവദിക്കുകയുള്ളൂ വെന്ന് പറഞ്ഞ് നാട്ടുകാര്‍ ആശുപത്രിക്ക് മുന്‍പില്‍ കുത്തിയിരിപ്പ് സമരം നടത്തി.
തുടര്‍ന്ന് ഇ.ടി ടൈസന്‍ മാസ്റ്റര്‍ എം.എല്‍.എയും മതിലകം ബ്ലോക്ക് പഞ്ചായത്ത് പ്രസിഡന്റ് കെ.കെ അബീദലി, മതിലകം ഗ്രാമപഞ്ചായത്ത് പ്രസിഡന്റ് ഇ.ജി സുരേന്ദ്രന്‍, പെരിഞ്ഞനം ഗ്രാമപഞ്ചായത്ത് പ്രസിഡന്റ് കെ.കെ സച്ചിത്ത് സ്ഥലത്തെത്തി നാട്ടുകാരും ബന്ധുക്കളുമായി സംസാരിച്ച് മൃതദേഹം പോസ്റ്റ്‌മോര്‍ട്ടത്തിനായി തൃശൂരിലേക്ക് മാറ്റി. കൊടുങ്ങല്ലൂര്‍ സി.ഐ ബിജു കുമാര്‍, മതിലകം എസ്.ഐ സില്‍വസ്റ്റര്‍ എന്നിവരുടെ നേതൃത്വത്തിലുള്ള പൊലിസ് സ്ഥലത്തെത്തി മേല്‍ നടപടികള്‍ സ്വീകരിച്ചു.