കാസര്‍കോട്: പ്രമുഖ കര്‍മശാസ്ത്ര പണ്ഡിതനും നീലേശ്വരം ഖാസിയും സമസ്ത കാസര്‍കോട് ജില്ലാ വൈസ് പ്രസിഡന്റുമായ ഇ.കെ മഹ്മൂദ് മുസ്‌ലിയാര്‍ സമസ്ത കേരള ജംഇയ്യത്തുല്‍ ഉലമയുടെ നേതൃശ്രേണിയിലേക്ക്. കഴിഞ്ഞ ദിവസം ചേര്‍ന്ന സമസ്ത കേന്ദ്ര മുശാവറ യോഗത്തിലാണ് മഹ്മൂദ് മുസ്‌ലിയാരെ കേന്ദ്ര മുശാവറ അംഗമായി തെരഞ്ഞെടുത്തത്.
പാണ്ഡിത്യവും വിനയവും ഒത്തിണങ്ങിയ മഹ്മൂദ് മുസ്‌ലിയാര്‍ കോട്ടപ്പുറം മദ്‌റസയിലാണ് പ്രാഥമിക മതവിദ്യാഭ്യാസം പൂര്‍ത്തിയാക്കിയത്. ശേഷം കോട്ടപ്പുറം ദര്‍സില്‍ ചേര്‍ന്നു.
പൊന്നാനി അബ്ദുല്ല മുസ്‌ലിയാരായിരുന്നു ഉസ്താദ്.പിന്നീട് കണ്ണൂര്‍ ജില്ലയിലെ മാട്ടൂലില്‍ ഇരിങ്ങല്ലൂര്‍ കുഞ്ഞമ്മു മുസ്‌ലിയാരുടെ കീഴിലുള്ള ദര്‍സിലും തുടര്‍ന്ന് ഇരുമ്പുംചോലയില്‍ കൈപ്പറ്റ ബീരാന്‍കുട്ടി മുസ്‌ലിയാരുടെ ദര്‍സിലും ശേഷം പെരുമ്പടപ്പ് പുത്തന്‍പള്ളിയില്‍ കരിങ്ങാപ്പാറ മുഹമ്മദ് മുസ്‌ലിയാരുടെ നേതൃത്വത്തിലുള്ള ദര്‍സിലും പഠനം നടത്തി. തുടര്‍ന്ന് വെല്ലൂര്‍ ബാഖിയാത്തില്‍ രണ്ടു വര്‍ഷത്തെ പഠനത്തിനു ശേഷം 1970 ഒക്ടോബര്‍ 15നു ബാഖവി ബിരുദം കരസ്ഥമാക്കി പുറത്തിറങ്ങി. പിന്നീട് ദയൂബന്ദില്‍ ഒരു വര്‍ഷം ദൗറത്തുല്‍ ഹദീസില്‍ പഠനം നടത്തി ബിരുദം നേടി.
തുടര്‍ന്ന് കണ്ണൂരിലെ മുല്ലക്കൊടി, നീലേശ്വരം എന്നിവിടങ്ങലില്‍ ആയിരുന്നു ദര്‍സ്. നീലേശ്വരത്ത് ദര്‍സ് തുടങ്ങി പത്തു വര്‍ഷത്തിനുശേഷം നീലേശ്വരം ഖാസിയായും മഹ്മൂദ് മുസ്‌ലിയാര്‍ നിയമിതനായി. 1988-1990 കാലഘട്ടത്തില്‍ നീലേശ്വരത്ത് മര്‍ക്കസ് ദഅവത്തുല്‍ ഇസ്‌ലാമിയ കോളജ് സ്ഥാപിച്ചു. ഒട്ടനവധി യുവ പണ്ഡിതന്മാര്‍ ഇപ്പോള്‍ മഹ്മൂദ് മുസ്‌ലിയാരില്‍ നിന്നു മതവിഷയത്തില്‍ പാണ്ഡിത്യം നേടി സമൂഹത്തിനിടയില്‍ പ്രവര്‍ത്തിക്കുന്നുണ്ട്.
ചെറുവത്തൂര്‍ മുണ്ടക്കുണ്ടില്‍ മുഹമ്മദ് മുസ്‌ലിയാര്‍, കോട്ടപ്പുറം ഇടക്കാവില്‍ കോട്ടയില്‍ ബീഫാത്തിമ എന്നിവരുടെ മകനാണ് ഇ.കെ മഹ്മൂദ് മുസ്‌ലിയാര്‍. എ.സി മറിയമാണ് ഭാര്യ. നിലവില്‍ ജില്ലയില്‍ സമസ്ത കേന്ദ്ര മുശാവറ അംഗങ്ങളായുള്ള ത്വാഖാ അഹമ്മദ് അല്‍ അസ്ഹരി, യു.എം അബ്ദുല്‍ റഹിമാന്‍ മൗലവി,എം.എ ഖാസിം മുസ്‌ലിയാര്‍ എന്നിവര്‍ക്കു പുറമെയാണ് ഇ.കെ മഹ്മൂദ് മുസ്‌ലിയാരെ കൂടി മുശാവറ അംഗമായി തെരഞ്ഞെടുത്തത്.