പേരാമ്പ്ര: ലക്ഷങ്ങള്‍ മുടക്കി പുനരുദ്ധരിച്ച റോഡ് പണിയില്‍ വ്യാപക അഴിമതി. ഏറെക്കാലം പൊട്ടിപ്പൊളിഞ്ഞു ഗതാഗതയോഗ്യമല്ലാതിരുന്ന പെരുവണ്ണാമൂഴി-മുതുകാട് റോഡ് നവീകരണ പ്രവൃത്തി നടത്തിയതില്‍ വന്‍ അഴിമതി നടന്നതായി നാട്ടുകാര്‍ ആരോപിക്കുന്നു. ജില്ലാ പഞ്ചായത്ത് 2015-16 വാര്‍ഷിക പദ്ധതിയില്‍ ഉള്‍പ്പെടുത്തി അനുവദിച്ച 25,00,000 രൂപ ഉപയോഗിച്ച് പെരുവണ്ണാമൂഴി ഫാത്തിമ മാതാ പള്ളി മുതല്‍ ഒന്നര കിലോമീറ്റര്‍ ഭാഗത്താണ് പ്രവൃത്തി നടന്നത്.
പെരുവണ്ണാമൂഴിയില്‍ നിന്ന് മുതുകാട്, പേരാമ്പ്ര, എസ്‌റ്റേറ്റ് എന്നിവിടങ്ങളില്‍ എത്തിച്ചേരാനുള്ള ഏക റോഡാണിത്. റീ ടാറിങ് പ്രവൃത്തി നടത്തി നവീകരിക്കേണ്ട റോഡില്‍ പല ഭാഗങ്ങളിലും ടാറിങ് നടത്തിയിട്ടില്ല. ഇങ്ങനെ പത്തു മുതല്‍ പതിനെട്ട് മീറ്റര്‍ ഭാഗം ടാറിങ് പ്രവൃത്തി നടത്താത്തതായി മൂന്നു ഭാഗങ്ങളുണ്ട്. മൂന്നു മീറ്റര്‍ വീതിയില്‍ റോഡില്‍ നവീകരണ പ്രവൃത്തി നടത്തേണ്ടതാണെങ്കിലും ചിലയിടങ്ങളില്‍ രണ്ടരയും അതില്‍ താഴയും മീറ്റര്‍ വീതിയിലാണ് ടാറിങ് നടത്തിയിരിക്കുന്നത്.
ടാറിങ് ചെയ്തതിന്റെ ഇരു ഭാഗങ്ങളിലും ഫില്ലിങ് നടത്താത്തതിനാല്‍ വാഹനങ്ങള്‍ക്ക് എതിര്‍ ദിശകളിലേക്ക് കടന്നുപോവാനും കഴിയുന്നില്ല. സാധാരണ ഗതിയില്‍ ടാറിങ്ങിന്റെ ഇരുവശവും കോണ്‍ക്രീറ്റ് ചെയ്യുകയോ മണ്ണിട്ട് ഉപരിതലം ടാറിങ്ങിന് സമാനമാക്കുകയോ ചെയ്യാറുണ്ടെങ്കിലും ഇവിടെ ചിലയിടങ്ങളില്‍ മാത്രം പേരിന് മണ്ണിടുകയാണ് ചെയ്തത്. ഏറെക്കാലത്തെ മുറവിളികള്‍ക്കും പ്രക്ഷോഭങ്ങള്‍ക്കും ഒടുവില്‍ നവീകരണത്തിന് തുക അനുവദിച്ചു കിട്ടിയപ്പോള്‍ കരാറുകാരന്‍ തീവെട്ടിക്കൊള്ള നടത്തിയതായി നാട്ടുകാര്‍ ആരോപിച്ചു.
ഇതേ റോഡില്‍ പെരുവണ്ണാമൂഴി ടൗണ്‍ മുതല്‍ ഫാത്തിമ മാത ചര്‍ച്ച് വരെയുള്ള ഭാഗം ഇറിഗേഷന്‍ വകുപ്പിന്റെ നേരിട്ടുള്ള നിയന്ത്രണത്തിലായതിനാല്‍ വകുപ്പ് നല്‍കിയ കരാര്‍ പ്രകാരം മറ്റൊരു കരാറുകാരനാണ് പ്രവൃത്തി നടത്തിയത്. ഈ ഭാഗത്തു കൃത്യതയോടെ നവീകരണ നടന്നിട്ടുണ്ടെന്നും ജില്ലാ പഞ്ചായത്തിന്റെ ഫണ്ടുപയോഗിച്ച് നടത്തിയ പ്രവൃത്തിയില്‍ പകുതി തുക പോലും വിനിയോഗിച്ചിട്ടില്ലെന്ന ആക്ഷേപവുമുണ്ട്. ഇതിനെതിരേ വിജിലന്‍സിന് പരാതി നല്‍കിയിരിക്കുകയാണ് റോഡിന്റെ ഗുണഭോക്താക്കള്‍.