ന്യൂഡല്‍ഹി: ലോക്‌സഭാ തെരഞ്ഞെടുപ്പിന്റെ അവസാനഘട്ടം ഇന്നലെ കഴിഞ്ഞതിനു പിന്നാലെ എക്‌സിറ്റ് പോള്‍ ഫലങ്ങള്‍ പുറത്തുവരുന്നതിനിടെ ഡല്‍ഹിയില്‍ നാടകീയ നീക്കങ്ങളും തുടങ്ങി.

കോണ്‍ഗ്രസിന്റെ ബദ്ധവൈരിയായ മായാവതി, കോണ്‍ഗ്രസ് അധ്യക്ഷന്‍ രാഹുല്‍ഗാന്ധിയുമായും യു.പി.എ അധ്യക്ഷ സോണിയാഗാന്ധിയുമായും ചര്‍ച്ച നടത്താന്‍ തീരുമാനിച്ചത് രാഷ്ട്രീയ രംഗത്ത് പുതിയ നീക്കത്തിനാണ് വഴിവച്ചത്.

തെരഞ്ഞെടുപ്പ് പ്രഖ്യാപിച്ചതിനുശേഷം മായാവതി കോണ്‍ഗ്രസിനെ ഒളിഞ്ഞും തെളിഞ്ഞും ആക്രമിച്ചിരുന്നെങ്കിലും ഇന്നലെ അതെല്ലാം മാറ്റി സമവായ ചര്‍ച്ചയ്ക്ക് മുന്നിട്ടിറങ്ങുന്ന കാഴ്ചയാണ് കണ്ടത്. തെലുഗുദേശം നേതാവ് ചന്ദ്രബാബു നായിഡു പ്രതിപക്ഷ ഐക്യത്തിനായി രംഗത്തിറങ്ങിയതിനു പിന്നാലെയാണ് മായാവതിയുടെ പുതിയ നീക്കം. സോണിയാഗാന്ധിയുമായി മായാവതി ഇന്ന് ചര്‍ച്ച നടത്തുമെന്ന് ബി.എസ്.പി നേതൃത്വം അറിയിച്ചു. തുടര്‍ന്ന് രാഹുല്‍ഗാന്ധിയുമായി ചര്‍ച്ച നടത്തുമെന്നും അവര്‍ വ്യക്തമാക്കി.