റിയോ ഡെ ജനീറോ: ബ്രസീല്‍ പ്രസിഡന്റ് സ്ഥാനാര്‍ഥി ജൈര്‍ ബോല്‍സൊനാരോയ്ക്കു കുത്തേറ്റു. മിനാസ് ഗെറിയാസിലെ തെരഞ്ഞെടുപ്പ് പ്രചാരണത്തിനിടെ വ്യാഴാഴ്ചയാണ് കുത്തേറ്റത്. ഗുരുതരമായി പരുക്കേറ്റ ഇദ്ദേഹത്തിന്റെ 40 ശതമാനം രക്തവും വാര്‍ന്നുപോയെന്ന് ഡോക്ടര്‍മാര്‍ അറിയിച്ചു.
രണ്ട് മാസത്തെ പൂര്‍ണ വിശ്രമത്തിന് ശേഷമേ ഇയാള്‍ക്ക് സാധാരണ ജീവിതത്തിലേക്ക് തിരിച്ചുവരാനാവുകയുള്ളൂവെന്ന് അവര്‍ അറിയിച്ചു. തീവ്രനിലപാട് പുലര്‍ത്തുന്ന ഇദ്ദേഹത്തിന്റെ വിദ്വേഷജനകമായ പ്രസ്താവനകള്‍ ബ്രസീലില്‍ വിവാദങ്ങളുണ്ടാക്കിയിരുന്നു. ഒക്ടോബറില്‍ പ്രസിഡന്റ് സ്ഥാനത്തേക്ക് നടക്കുന്ന ആദ്യഘട്ട തെരഞ്ഞടുപ്പില്‍ ജൈര്‍ ബോല്‍സൊനാരോ ഭൂരിപക്ഷം നേടുമെന്ന് രാഷ്ട്രീയ നിരീക്ഷകള്‍ അഭിപ്രായപ്പെട്ടിരുന്നു. യാഥാസ്ഥിക വിഭാഗത്തിന് ഇടയില്‍ ഇദ്ദേഹത്തിന് മികച്ച സ്വാധീനമാണുള്ളത്.