മലപ്പുറം: പാണക്കാട് സയ്യിദ് മുഹമ്മദലി ശിഹാബ് തങ്ങളുടെ ഓര്‍മയില്‍ നിറഞ്ഞു തങ്ങള്‍ കുടുംബാംഗങ്ങള്‍ ഒത്തുചേര്‍ന്നു. തങ്ങളുടെ നിര്യാണത്തിന്റെ എട്ടാം വര്‍ഷത്തിലെ ആണ്ട് ദിനത്തില്‍ ഇത്തവണ മൂത്തപുത്രന്‍ സയ്യിദ് ബഷീറലി ശിഹാബ് തങ്ങളുടെ വസതിയിലായിരുന്നു ഉറൂസ് പരിപാടി. കൊടപ്പനക്കല്‍ തങ്ങള്‍ കുടുംബാംഗങ്ങളും ബന്ധുക്കളും ശിഹാബ് തങ്ങളുടെ സതീര്‍ഥ്യരുമുള്‍പ്പെടെയാണ് ഇന്നലെ നടന്ന ചടങ്ങില്‍ ഒത്തുചേര്‍ന്നത്.
രാവിലെ പതിനൊന്നിന് കുടുംബത്തിലെ കാരണവര്‍ സയ്യിദ് ഹൈദരലി ശിഹാബ് തങ്ങളുടെ നേതൃത്വത്തില്‍ മൗലീദ് പാരായണവും പ്രാര്‍ഥനയും നടന്നു. സയ്യിദ് അബ്ദുല്ല ബാഫഖി തങ്ങള്‍, സയ്യിദ് ബഷീറലി ശിഹാബ് തങ്ങള്‍, സയ്യിദ് ഹമീദലി ശിഹാബ് തങ്ങള്‍, മുസ്‌ലിം ലീഗ് ദേശീയ ജന. സെക്രട്ടറി പി.കെ കുഞ്ഞാലിക്കുട്ടി, സംസ്ഥാന സെക്രട്ടറി കെ.പി.എ മജീദ്, എസ്.വൈ.എസ് ഭാരവാഹികളായ ഹാജി കെ മമ്മദ് ഫൈസി, ഹസന്‍ സഖാഫി പൂക്കോട്ടൂര്‍, അബ്ദുല്‍ ഖാദിര്‍ ഫൈസി കുന്നുംപുറം, കാടാമ്പുഴ മൂസ ഹാജി, പാണക്കാട് ഖത്വീബ് കെ.പി.എം അഷ്‌റഫ് ഫൈസി, ആസിഫ് ദാരിമി പുളിക്കല്‍ തുടങ്ങി നിരവധി പേര്‍ പരിപാടിയില്‍ സംബന്ധിച്ചു.