പരപ്പനങ്ങാടി: കാലിക്കറ്റ് സര്‍വകലാശാലക്ക് സമീപം പാണമ്പ്രയില്‍ വന്‍ കഞ്ചാവ് വേട്ട. പരപ്പനങ്ങാടി എക്‌സൈസ് സര്‍ക്കിള്‍, റേഞ്ച് ഓഫിസുകള്‍ സംയുക്തമായി നടത്തിയ റെയ്ഡില്‍ പാണമ്പ്ര ദേശീയപാതയോരത്തെ ക്വാര്‍ാട്ടേഴ്‌സുകളില്‍ നിന്നാണ് മൂന്ന് കിലോഗ്രാമിലധികം വരുന്ന കഞ്ചാവ് പരപ്പനങ്ങാടി എക്‌സൈസ് റെയ്ഞ്ച് ഇന്‍സ്‌പെക്ടര്‍ എം.ഒ വിനോദും സംഘവും പിടികൂടിയത്.
വയനാട് മേപ്പാടി സ്വദേശി തച്ചന്‍കോടന്‍ മുസ്തഫ (57), തമിഴ്‌നാട് പെരമ്പല്ലൂര്‍ പെന്നക്കോണം സ്വദേശി രാജ (42 ) എന്നിവരെയാണ് എക്‌സൈസ് അറസ്റ്റ് ചെയ്തത്. സ്ത്രീകളെ ഉപയോഗിച്ച് വന്‍തോതില്‍ കഞ്ചാവ് വില്‍പന നടക്കുന്നതായുള്ള വിവരത്തിന്റെ അടിസ്ഥാനത്തില്‍ കഴിഞ്ഞ കുറച്ചു ദിവസങ്ങളിലായി ഈ ഭാഗങ്ങളില്‍ എക്‌സൈസ് നിരീക്ഷിച്ച് വരികയായിരുന്നു.
കലിക്കറ്റ് സര്‍വകലാശാല കാംപസ് പരിസരങ്ങളിലും മറ്റും ചെറുകിട വിതരണക്കാര്‍ക്ക് എത്തിച്ചു നല്‍കാനായി സൂക്ഷിച്ചതാണിതെന്ന് എക്‌സൈസ് അറിയിച്ചു. റെയ്ഡില്‍ ഇന്‍സ്‌പെക്ടര്‍ക്ക് പുറമെ പ്രിവന്റീവ് ഓഫീസര്‍മാരായ സുര്‍ജിത്, കെ. അഭിലാഷ് , പ്രജോഷ് കുമാര്‍, പി. ബിജു, സിവില്‍ എക്‌സൈസ് ഓഫിസര്‍മാരായ കെ. പ്രദീപ് കുമാര്‍, കെ. ശിഹാബുദ്ദീന്‍, സമേഷ്, ദിലീപ്,വനിത ഓഫിസര്‍മാരായ മായ ദേവി, പി. ലിഷ, ഡ്രൈവര്‍ ചന്ദ്രമോഹന്‍ എന്നിവരും പങ്കെടുത്തു.