മറയൂര്‍: 15 കിലോ ചന്ദനവുമായി യുവാവ് വനപാലകരുടെ പിടിയിലായി. മറയൂര്‍ ഇരുട്ടളകുടി സ്വദേശി ശ്രീരാമന്‍ (34) ആണ് പിടിയിലായത്.
ഇയാളില്‍ നിന്നും മുറിച്ചു കഷ്ണങ്ങളാക്കിയ ചന്ദനം കണ്ടെടുത്തു. ചന്ദനം കാട്ടിലൂടെ മാങ്കുളം, ആനക്കുളം എന്നിവടങ്ങളില്‍ എത്തിച്ച് അടിമാലി കേന്ദ്രീകരിച്ചുള്ള സംഘത്തിന് കൊടുക്കുകയാണ് രീതി. ഇങ്ങനെ നിരവധി തവണകളായി 65 കിലോ ചന്ദനത്തടിയാണ് വില്‍പന നടത്തിയിരിക്കുന്നത്.
ഇയാളില്‍നിന്നും ചന്ദനം വാങ്ങിയവരെകുറിച്ച് ഉദ്യോഗസ്ഥര്‍ക്ക് സൂചന ലഭിച്ചു.
ഒരുമാസം മുന്‍പ് കാരയൂര്‍ റിസര്‍വിലെ ചുരക്കുളം ഭാഗത്തുനിന്നും മുറിച്ച ചന്ദന മരത്തിന്റെ ഭാഗങ്ങളാണ് ചാക്കില്‍കെട്ടി ഒളിപ്പിച്ചനിലയില്‍ പിടിച്ചെടുത്തത്.
കാന്തല്ലൂര്‍ റെയിഞ്ചിലെ വനപാലകര്‍ പട്രോളിംഗിനിടെ ചന്ദ്രമണ്ഡലം ഭാഗത്ത് സംശയംതോന്നി പിടികൂടി ചോദ്യംചെയ്തപ്പോഴാണ് ചന്ദനത്തടികള്‍ കണ്ടെടുത്തത്.
കാന്തല്ലൂര്‍ ഡെപ്യൂട്ടി റെയിഞ്ചര്‍ ആര്‍.അജിത്ത് കുമാറിന്റെ നേതൃത്വത്തിലുള്ള വനപാലക സംഘമാണ് പ്രതിയെ പിടികൂടിയത്.