കൊണ്ടോട്ടി: സാമ്പത്തിക വര്‍ഷം ആറു മാസം പിന്നിട്ടിട്ടും തദ്ദേശ സ്ഥാപനങ്ങള്‍ 2020-21ലെ പുതിയ പദ്ധതികള്‍ പൂര്‍ത്തീകരിച്ചത് 9.72 ശതമാനം മാത്രം. നിലവില്‍ പദ്ധതി പ്രവൃത്തികള്‍ 31.35 ശതമാനത്തില്‍ എത്തിയെങ്കിലും 21.62 ശതമാനവും മുന്‍വര്‍ഷത്തെ സ്പില്‍ ഓവര്‍ പദ്ധതികളാണ് പൂര്‍ത്തിയാക്കിയത്.
കൊവിഡ് വ്യാപനത്തില്‍ തദ്ദേശ സ്ഥാപനങ്ങളുടെ പ്രവര്‍ത്തനങ്ങളുടെ നിയന്ത്രണം, തൊഴിലാളിക്ഷാമം, അസംസ്‌കൃത വസ്തുക്കളുടെ ലഭ്യതക്കുറവ്, കണ്ടെയ്ന്‍മെന്റ് സോണ്‍ തുടങ്ങിയവയാണ് പദ്ധതി പ്രവൃത്തികള്‍ക്കു തിരിച്ചടിയാകുന്നത്. പുതിയ പദ്ധതികള്‍ തുടങ്ങാനും തുടങ്ങിയവ പൂര്‍ത്തീകരിക്കാനും കഴിയാത്ത അവസ്ഥയാണ് നിലവില്‍. അതേസമയം, ചെറിയ പദ്ധതികളുടെ പൂര്‍ത്തീകരണ ബില്ലുകള്‍ ട്രഷറികളില്‍നിന്ന് ലഭിക്കാത്തത് കരാറുകാരെയും പിറകോട്ട് വലിക്കുന്നു. വരുംദിവസങ്ങളില്‍ കൊവിഡ് വ്യാപനത്തിനു പുറമെ തദ്ദേശ തെരഞ്ഞെടുപ്പ് പ്രഖ്യാപനവും പദ്ധതികളെ ബാധിക്കും.
ബ്ലോക്ക് പഞ്ചായത്തുകളില്‍ 37.35 ശതമാനം പ്രവൃത്തികള്‍ പൂര്‍ത്തിയായെങ്കിലും 28.28 ശതമാനവും സ്പില്‍ ഓവര്‍ പദ്ധതികളാണ്. 9.57 ശതമാനമാണ് തനതു വര്‍ഷം പൂര്‍ത്തിയാക്കിയത്. ജില്ലാ പഞ്ചായത്തുകള്‍ 37.82 ശതമാനം പ്രവൃത്തികള്‍ പൂര്‍ത്തീകരിച്ചെങ്കിലും ഈ സാമ്പത്തിക വര്‍ഷത്തിലെ പദ്ധതികള്‍ ആകെ 8.15 ശതമാനം മാത്രമാണ്. 29.66 ശതമാനവും സ്പില്‍ ഓവര്‍ പദ്ധതികളാണ്.
നഗരസഭകള്‍ ഇതുവരെ 28.98 ശതമാനം പദ്ധതികളാണ് പൂര്‍ത്തിയാക്കിയത്. ഇതില്‍ സ്പില്‍ ഓവര്‍ പദ്ധതികളാണ് 18.80 ശതമാനവും. 10.19 ശതമാനം പ്രവൃത്തികളാണ് ഈ വര്‍ഷത്തേതുള്ളത്. കോര്‍പറേഷന്‍ 22.08 ശതമാനത്തില്‍ 4.62 ശതമാനം മാത്രമാണ് പുതിയ പദ്ധതികള്‍ പൂര്‍ത്തീകരിച്ചത്. ഇതില്‍ 17.46 ശതമാനവും സ്പില്‍ ഓവര്‍ പദ്ധതികളാണ്.