ആലപ്പുഴ:  ജില്ലയിലെ ആറാട്ടുപുഴ, വലിയഴീക്കല്‍ ഉള്‍പ്പെടുന്ന തീരപ്രദേശത്ത് കടലാക്രമണം രൂക്ഷമായിക്കൊണ്ടിരിക്കുന്ന സാഹചര്യത്തില്‍ ഈ പ്രദേശത്ത് കടല്‍ഭിത്തി നിര്‍മാണം അടിയന്തിരമായി ആരംഭിക്കണമെന്നാവശ്യപ്പെട്ട് മന്ത്രിക്ക് കെ.സി വേണുഗോപാല്‍ എം.പി കത്തയച്ചു. കടല്‍ഭിത്തി ദുര്‍ബലമായ പ്രദേശങ്ങളില്‍ കാലനുസൃതമായ അറ്റകുറ്റപ്പണികള്‍ നടത്തണമെന്ന ജനങ്ങളുടെ ദീര്‍ഘകാല ആവശ്യം അവഗണിച്ചതാണ് ഇപ്പോഴത്തെ ദുരവസ്ഥയ്ക്കു കാരണം.
പലപ്രദേശങ്ങളിലും തീരദേശപാത കഴിഞ്ഞും ജനവാസ കേന്ദ്രങ്ങളിലേയ്ക്ക് കടല്‍ കയറുന്നത് ഗുരുതരമായ സാഹചര്യമാണെന്നും ഇതുനേരിടുന്നതിനു പരമ്പരാഗത കടല്‍ഭിത്തി നിര്‍മാണത്തിനുപകരം കോണ്‍ക്രീറ്റ്കൂടി ഉപയോഗിച്ചുകൊണ്ട് ഉയരത്തിലുള്ള കടല്‍ഭിത്തി നിര്‍മിക്കുന്നതിനുള്ള സാദ്ധ്യതകള്‍ തേടണമെന്നും എം.പി കത്തില്‍ ആവശ്യപ്പെട്ടു.
കടലാക്രമണം ഇനിയും രൂക്ഷമായ തുടരുന്നപക്ഷം ആവശ്യമായ മുന്‍കരുതല്‍ നടപടികള്‍ എത്രയുംവേഗം സ്വീകരിക്കുവാന്‍ കലക്ടര്‍ക്ക് എം.പി നിര്‍ദേശം നല്‍കി.