മെക്‌സിക്കോ സിറ്റി: മെക്‌സിക്കോയിലെ വെടിമരുന്നുശാലയില്‍ തീപിടിച്ചുണ്ടായ പൊട്ടിത്തെറിയില്‍ 14 പേര്‍ മരിച്ചു. മരിച്ചവരില്‍ അഞ്ചു കുട്ടികളും ഉള്‍പ്പെടും. 22 പേര്‍ക്ക് പരുക്കേറ്റു. മെക്‌സിക്കോ നഗരത്തിന്റെ 200 കി.മി തെക്കുകിഴക്കന്‍ മേഖലയായ പീബ്ലയിലാണ് അപകടം.
വാര്‍ഷികോത്സവം നടക്കാനിരിക്കെ തയാറാക്കിവച്ച വെടിമരുന്നുകളാണ് പൊട്ടിത്തെറിച്ചത്. ഈമാസം 15 നാണ് ഉത്സവം. അഞ്ചു മാസം മുന്‍പ് ഇവിടെ സമാനമായി നടന്ന സ്‌ഫോടനത്തില്‍ 30 പേര്‍ കൊല്ലപ്പെടുകയും 70 പേര്‍ക്ക് പരുക്കേല്‍ക്കുകയും ചെയ്തിരുന്നു.