കണ്ണൂര്‍: മൂന്നാറില്‍ വിനോദയാത്ര കഴിഞ്ഞു മടങ്ങുകയായിരുന്ന കുട്ടികള്‍ ഉള്‍പ്പെടെയുള്ള കുടുംബം സഞ്ചരിച്ച കാര്‍ ഓടുന്നതിനിടെ കത്തിനശിച്ചു. ചാലാട് മണലില്‍ തിങ്കളാഴ്ച അര്‍ധരാത്രി 12.45ഓടെയായിരുന്നു സംഭവം. താണ സ്വദേശി സി.എച്ച് അക്തറുല്‍ അമാനും കുടുംബവും സഞ്ചരിച്ച കാറാണ് പൂര്‍ണമായും കത്തിയത്. മറ്റു ബന്ധുക്കളെ താണയിലെ വീട്ടില്‍ ഇറക്കിയശേഷം പഴങ്ങാടിയിലെ ഭാര്യവീട്ടിലേക്കു പോകുന്നതിനിടെയായിരുന്നു അപകടം. സ്റ്റിയറിങിനു താഴെ പുക ഉയരുന്നതു കണ്ട് കാര്‍ റോഡരികില്‍ നിര്‍ത്തി അക്തറും കുടുംബവും പുറത്തിറങ്ങിയ ഉടനെയാണ് തീ പടര്‍ന്നത്. അഗ്‌നിശമന സേന എത്തുമ്പോഴേക്കും കാര്‍ പൂര്‍ണമായും കത്തിയിരുന്നു. ഷോര്‍ട്ട് സര്‍ക്യൂട്ടാണ് കാരണമെന്നാണ് പ്രാഥമിക നിഗമനം. കണ്ണാടിപ്പറമ്പ് സ്വദേശി എന്‍. ആസാദിന്റെ ഉടമസ്ഥതയിലുള്ളതാണ് കാര്‍.