പാലക്കാട്: മലയാളത്തിന്റെ മഹാകവി അക്കിത്തം അച്യുതന്‍ നമ്പൂതിരി ഇനി അനുവാചകരുടെ ഓര്‍മകളില്‍. വിടവാങ്ങിയ മഹാകവിയുടെ സംസ്‌കാരം ഔദ്യോഗിക ബഹുമതികളോടെ ജന്മനാട്ടില്‍ നടന്നു. പാലക്കാട്ടെ കുമരനെല്ലൂര്‍ ഗ്രാമത്തിലെ ദേവായനത്തിന്റെ വീട്ടുവളപ്പിലാണ് മൃതദേഹം സംസ്‌കരിച്ചത്. പ്രിയ കവിക്ക് ആദരാഞ്ജലിയര്‍പ്പിക്കാന്‍ നിരവധി പേരാണ് ദേവായനത്തിലേക്ക് എത്തിയത്.

തൃശ്ശൂരിലെ സ്വകാര്യ ആശുപത്രിയില്‍ രാലിലെ 7.55നാണ് അദ്ദേഹം അന്തരിച്ചത്. നാലു ദിവസമായി മൂത്രാശയ രോഗത്തെ തുടര്‍ന്ന് ഇവിടെ ചികിത്സയിലായിരുന്നു. ആരോഗ്യനില രാത്രിയോടെയാണ് വഷളായത്.
ആശുപത്രിയില്‍ നിന്ന് സാഹിത്യ അക്കാദമിയില്‍ എത്തിച്ച മൃതദേഹം ഒരു മണിക്കൂറിലേറെ പൊതുദര്‍ശനത്തിനു വെച്ചു. സാഹിത്യ സാംസ്‌കാരിക രാഷ്ട്രീയ രംഗത്തെ പ്രമുഖര്‍ അന്തിമോപചാരം അര്‍പ്പിക്കാനെത്തിയിരുന്നു.