പേരിയ: മഴക്കെടുതിയില്‍ തകര്‍ന്ന കൊട്ടിയൂര്‍-വയനാട് പാതയിലെ പാല്‍ചുരം ബോയിസ് ടൗണ്‍ റോഡിന്റെ കോണ്‍ക്രീറ്റ് പ്രവൃത്തി പൂര്‍ത്തിയായി.
റോഡ് പൂര്‍ണമായും തകര്‍ന്ന ചെകുത്താന്‍ തോട് ഭാഗത്താണ് കോണ്‍ക്രീറ്റ് പ്രവൃത്തി നടത്തിയത്. റോഡില്‍ മണ്ണിടിഞ്ഞ് ഗതാഗതം തടസപ്പെട്ട ഭാഗങ്ങളിലുള്ള മണ്ണ് നീക്കി റോഡില്‍ വീതി വരുത്തിയിട്ടുണ്ട്. ആശ്രമം ജങ്ഷനു സമീപം കുന്നിന്‍ മുകളില്‍ അപകടഭീഷണി ഉയര്‍ത്തി നിന്ന കൂറ്റന്‍ കല്ല് പൊട്ടിച്ച് നീക്കിയിട്ടുണ്ട്. ഏതാനും ദിവസങ്ങള്‍ക്കകം തന്നെ റോഡ് ഗതാഗതത്തിനു തുറന്ന് കൊടുക്കാന്‍ കഴിയുമെന്നാണ് പൊതുമരാമത്ത് അധികൃതര്‍ പറയുന്നത്. ചെകുത്താന്‍ തോടിനു സമീപം റോഡില്‍ ഇന്റര്‍ലോക്ക് ചെയ്ത് ഗതാഗതം ഉടന്‍ പുനഃസ്ഥാപിക്കാനായിരുന്നു അധികൃതര്‍ ആദ്യം തീരുമാനിച്ചതെങ്കിലും പിന്നീട് ഇവിടെ കോണ്‍ക്രീറ്റ് ചെയ്യാമെന്ന നിഗമനത്തിലെത്തുകയായിരുന്നു. ഇതാണു ഗതാഗതത്തിന് തുറന്ന് കൊടുക്കുന്നതിന് കാലതാമസം നേരിട്ടത്. ചെറുവാഹനങ്ങള്‍ക്കായി റോഡ് തുറന്ന് കൊടുക്കുമെങ്കിലും ആര്‍.ടി.ഒ, പി.ഡബ്ല്യു.ഡി എന്‍ജിനിയര്‍മാര്‍ എന്നിവര്‍ റോഡ് പരിശോധിച്ച് ഫിറ്റ്‌നസ് സര്‍ട്ടിഫിക്കറ്റ് നല്‍കിയതിനു ശേഷം മാത്രമേ ബസ് ഉള്‍പ്പെടെയുള്ള വലിയ വാഹനങ്ങള്‍ക്ക് ഇതുവഴി യാത്രചെയ്യാന്‍ കഴിയുകയുള്ളൂ.