തിരൂരങ്ങാടി: ബസും ക്വാളിസ് വാനും കൂട്ടിയിടിച്ച് ആറു പേര്‍ക്ക് പരുക്ക്. ദേശീയപാത വെന്നിയൂര്‍ കാച്ചടിയില്‍ ഇന്നലെ ഉച്ചയ്ക്ക് 2.30നാണ് അപകടമുണ്ടായത്. കോഴിക്കോട്ടുനിന്നു തൃശൂരിലേക്കു പോകുകയായിരുന്ന ആണ്ടവ ബസും എതിരേ വന്ന ക്വാളിസ് വാനുമാണ് കൂട്ടിയിടിച്ചത്.
അപകടത്തില്‍ ഗുരുതരമായി പരുക്കേറ്റ വാനിലെ യാത്രക്കാരായ പറമ്പില്‍പീടിക പുതിയപറമ്പ് അബ്ദുല്‍ സലീം (38), കിഴക്കാട്ടില്‍ സന്തോഷ് (35) എന്നിവരെ കോഴിക്കോട് സ്വകാര്യ ആശുപത്രിയില്‍ പ്രവേശിപ്പിച്ചു. ബസ് യാത്രക്കാരായ വെന്നിയൂര്‍ പുതുക്കുടി ഖദീജ (54), പുത്തനത്താണി സ്വദേശി മേരി (44) തുടങ്ങി നാലു പേര്‍ക്ക് നിസാര പരുക്കേറ്റു. അമിത വേഗതയിലെത്തിയ ബസ് കാച്ചടി വളവില്‍ മറ്റൊരു വാഹനത്തെ മറികടക്കുന്നതിനിടെ എതിരേ വന്ന ക്വാളിസുമായി ഇടിക്കുകയായിരുന്നുവെന്നു ദൃക്‌സാക്ഷികള്‍ പറയുന്നു.