റിയാദ്: വിവിധ സീസണ്‍ ആഘോഷത്തിലേക്ക് മറ്റൊരു സീസണ്‍ കൂടി എത്തുന്നു. വസന്തം, ഹേമന്തം, വേനല്‍ക്കാലം എന്നിവയിലേക്ക് ആഘോഷങ്ങളുടെ കാലമായാണ് ഈദ് സീസണും വന്നെത്തുന്നത്.
സഊദിയിലെ സീസണുകളുടെ ഉന്നതാധികാര സമിതിയാണ് പുതിയ തീരുമാനം കൈകൊണ്ടത്. ഇതോടെ കാലാവസ്ഥാ മാറ്റത്തിലൂടെ സീസണുകള്‍ അറിയപ്പെടുമ്പോള്‍ ,സന്തോഷത്തിന്റെ കാലമായി ആഘോഷത്തിനും ആഹ്ലാദത്തിനുമായി ഈദ് സീസണും ആഘോഷിക്കപ്പെടും.
'മൗസം അല്‍ ഈദ് 'എന്നറിയപ്പെടുന്ന ഈ സീസണില്‍ ലോകമാകെ സ്‌നേഹവും സന്തോഷവും വ്യാപിപ്പിക്കുന്നതിനും ജീവിതം സന്തോഷത്തില്‍ ആറാടിക്കുന്നതിനുമായി പെരുന്നാളിനെ മാറ്റുകയും ഈ സന്ദേശം വ്യാപിപ്പിക്കുകയും ചെയ്യുകയാണ് പുതിയ തീരുമാനത്തിന്റെ ലക്ഷ്യം.
പെരുന്നാളിന്റെ സഹന, സ്‌നേഹ സന്ദേശം മാലോകര്‍ക്ക് പകര്‍ന്നു നല്‍കുകയും ഇസ്‌ലാമിക ഉന്നത മൂല്യങ്ങള്‍ ഉയര്‍ത്തിപിടിക്കുന്നതില്‍ സഊദി പുതിയൊരു കാല്‍വെപ്പാണ് നടത്തുന്നതെന്നും പുതിയ സീസണ്‍ രൂപകല്‍പ്പന ചെയ്ത സീസണ്‍ സമിതി വ്യക്തമാക്കി.
ഇതിന്റെ സന്ദേശം പ്രചരിപ്പിക്കാന്‍ ഔദ്യോഗിക മാധ്യമങ്ങളില്‍ അകൗണ്ടുകളും വെബ്‌സൈറ്റും ആരംഭിച്ചിട്ടുണ്ട്.