ലണ്ടന്‍: അമിതമായ വേദനാസംഹാരി ഗുളികള്‍ ഉപയോഗിക്കുന്നത് ഹൃദയാഘാതത്തിനിടയാക്കുമെന്ന് പുതിയ പഠനം. സാധാരണ വേദനാസംഹാരികളായി ഉപയോഗിക്കുന്ന ഇബുപ്രോഫന്‍ പോലെയുള്ള ഗുളികളുടെ ഉയര്‍ന്ന തോതിലുള്ള ഉപയോഗമാണ് ഹൃദയാഘാതത്തിലേക്ക് നയിക്കുന്നത്.
ലണ്ടന്‍ ആസ്ഥാനമായുള്ള ആരോഗ്യ ഗവേഷണ വാരികയായ ബ്രിട്ടീഷ് മെഡിക്കല്‍ ജേണലാ(ബി.എം.ജെ)ണ് പുതിയ പഠനം പുറത്തുവിട്ടത്. പതിവായി വേദനാസംഹാരി ഗുളികകള്‍ കഴിക്കുന്ന 70 വയസ് പ്രായമായ 4,46,763 പേര്‍ക്കിടയില്‍ നടത്തിയ സര്‍വേ അടിസ്ഥാനമാക്കിയാണ് ജേണല്‍ പുതിയ നിരീക്ഷണം നടത്തിയത്. ബ്രിട്ടന്‍, നെതര്‍ലന്‍ഡ്‌സ്, ഇറ്റലി, ജര്‍മനി, കാനഡ, ഫിന്‍ലാന്‍ഡ് എന്നിവിടങ്ങളിലുള്ള ജനങ്ങള്‍ക്കിടയിലാണ് സര്‍വേ നടത്തിയത്.
കടുത്ത വേദനകളില്‍നിന്നു രക്ഷ നേടാന്‍ സാധാരണ ജനങ്ങള്‍ ആശ്രയിക്കാറുള്ള ഇബുപ്രോഫെന്‍, നാപ്‌റോക്‌സന്‍, ഡിക്ലോഫെനാക് പോലെയുള്ള നോണ്‍ സ്റ്റിറോയ്ഡല്‍ ആന്റി-ഇന്‍ഫ്‌ളമേറ്ററി ഡ്രഗ്(എന്‍.എസ്.എ.ഐ.ഡി) ആണ് ഇത്തരത്തില്‍ ജനങ്ങളുടെ ജീവന്‍ അപഹരിക്കുന്നത്. ഗുളിക ഉപയോഗിച്ച് ഒരു മാസത്തിനുള്ളില്‍ തന്നെ ഇതിന്റെ പ്രതികരണങ്ങള്‍ കണ്ടുതുടങ്ങുമെന്ന് ഗവേഷകര്‍ പറയുന്നു. ഉദാഹരണത്തിന് ഇബുപ്രോഫെന്‍ ഒരു ദിവസം 1,200 മി.ഗ്രാമിനു മുകളില്‍ കഴിച്ചാല്‍ അത് അപകടകരമാണ്.