തെഹ്‌റാന്‍: ഇറാന്‍ പ്രസിഡന്റ് ഹസന്‍ റൂഹാനിയെ സസ്‌പെന്‍ഡ് ചെയ്യുന്നതിന് പാര്‍ലമെന്റ് അംഗങ്ങളുടെ പിന്തുണ തേടി ദേശീയ സുരക്ഷാ-വിദേശനയ കമ്മിഷന്‍ മേധാവി മുജ്തബ സന്നര്‍. രാജ്യത്തെ പ്രതിസന്ധിക്ക് കാരണക്കാരന്‍ റൂഹാനിയാണെന്നും അദ്ദേഹത്തെ പുറത്താക്കാനുള്ള സാധ്യതകള്‍ പഠിച്ചുവരുകയാണെന്നും മുജ്തബ പറഞ്ഞു.

റൂഹാനിയെ സസ്‌പെന്‍ഡ് ചെയ്യണമെന്നാവശ്യപ്പെടുന്ന കത്തില്‍ പാര്‍ലമെന്റിലെ 290 അംഗങ്ങളില്‍ 44 പേര്‍ ഇതിനകം ഒപ്പുവച്ചിട്ടുണ്ട്. രാജ്യത്തെ അരക്ഷിതാവസ്ഥ പരിഹരിക്കുന്നതിനായി പ്രസിഡന്റിനെ സസ്‌പെന്‍ഡ് ചെയ്യാന്‍ മറ്റു എം.പിമാരോടും ആവശ്യപ്പെടുമെന്ന് അദ്ദേഹം വ്യക്തമാക്കി. അതേസമയം പാര്‍ലമെന്റില്‍ മൂന്നിലൊന്ന് അംഗങ്ങള്‍ അംഗീകരിച്ചാലേ പ്രസിഡന്റിനെ പുറത്താക്കാനാവൂ. അടുത്ത വര്‍ഷത്തോടെയേ റൂഹാനിയുടെ ഭരണകാലപരിധി അവസാനിക്കൂ.

ഇറാന്‍ റിയാല്‍ റെക്കോര്‍ഡ് തകര്‍ച്ചയിലായതും പണപ്പെരുപ്പവും രാജ്യത്ത് പ്രസിഡന്റിനെതിരായ വികാരം സൃഷ്ടിച്ചിട്ടുണ്ട്. സാമ്പത്തിക പ്രതിസന്ധിയും കൊവിഡ് മഹാമാരിയും നേരിടുന്നതില്‍ റൂഹാനി പരാജയമാണെന്ന് പ്രതിപക്ഷം ആരോപിക്കുന്നു.