കല്‍പ്പറ്റ: ജോലിയില്‍ കൃത്യവിലോപം കാണിച്ച കല്‍പ്പറ്റ കെ.എസ്.ആര്‍.ടി.സി യൂനിറ്റിലെ എ.ടി.ഒക്ക് സസ്‌പെന്‍ഷന്‍. മേലുദ്യോഗസ്ഥരുടെ അനുവാദമില്ലാതെയും യാതൊരുവിധ മുന്നറിയിപ്പുമില്ലാതെയും ലീവില്‍ പോയതിനെത്തുടര്‍ന്നാണ് എ.ടി.ഒ ടി.വി കോശിയെ അന്വേഷണ വിധേയമായി സസ്‌പെന്‍ഡ് ചെയ്തത്. പല തവണ ഇയാളെ താക്കീത് ചെയ്തിരുന്നു.
എന്നാല്‍ ഇത്തരം പ്രവൃത്തികള്‍ തുടരുകയും മിക്കവാറും ദിവസങ്ങളിലും യൂനിറ്റില്‍ ഹാജരാകാതിരിക്കുകയും ചെയ്തതിനെത്തുടര്‍ന്നാണ് കോശിക്കെതിരേ കെ.എസ്.ആര്‍.ടി.സി വിജിലന്‍സ് ഡയരക്ടര്‍ അച്ചടക്ക നടപടി സ്വീകരിച്ചത്. ഇത്തരം പ്രവൃത്തി ഗുരുതരമായ ഔദ്യോഗിക കൃത്യവിലോപവും അച്ചടക്ക ലംഘനവുമായി പ്രഥമദൃഷ്ട്യാ ബോധ്യമായതിനെ തുടര്‍ന്നാണ് സസ്‌പെന്‍ഡ് ചെയ്തതെന്ന് അധികൃതര്‍ അറിയിച്ചു.