കൊണ്ടോട്ടി: കരിപ്പൂര്‍ വിമാനത്താവളത്തില്‍ അപകടത്തില്‍പ്പെട്ട എയര്‍ഇന്ത്യ എക്‌സ്പ്രസ് വിമാനം ഇന്ന് സംഭവ സ്ഥലത്ത് നിന്ന് മാറ്റും. മുംബൈയില്‍ നിന്നുളള എയര്‍ഇന്ത്യ ഉദ്യോഗസ്ഥരുടെ സാന്നിധ്യത്തിലായിരിക്കും മാറ്റുക. എയര്‍പോര്‍ട്ട് അതോറിറ്റിയുടെ സ്ഥലത്ത് കൂട്ടാലുങ്ങല്‍ ഭാഗത്ത് പ്രത്യേകമായി ഒരുക്കിയ സ്ഥലത്തേക്കാണ് മാറ്റുക. ഇവിടെ പ്രത്യേക കോണ്‍ക്രീറ്റ് പ്രതലം തയാറാക്കിയിട്ടുണ്ട്. ഇതിനായി ക്രെയിന്‍ അടക്കമുള്ളവ സ്ഥലത്തെത്തിച്ചു.

അപകടത്തില്‍ വിമാനം രണ്ട് കഷ്ണങ്ങളായി മുറിഞ്ഞിരിക്കുകയാണ്. അതിനാല്‍ വിമാനത്തിന്റെ ഭാഗങ്ങള്‍ കൊണ്ടുപോകുന്നതിനുള്ള വഴിയും സജീകരിച്ചിട്ടുണ്ട്. കഴിഞ്ഞ ഓഗസ്റ്റ് ഏഴിനായിരുന്നു ദുബൈയില്‍ നിന്നും എത്തിയ എയര്‍ഇന്ത്യ എക്‌സ്പ്രസ് വിമാനം അപകടത്തില്‍പ്പെട്ട് 21 പേര്‍ മരിച്ചത്. 

അപകടം അന്വേഷിക്കുന്നതിനായി എയര്‍ക്രാഫ്റ്റ് ആക്‌സിഡന്റ് ഇന്‍വെസ്റ്റിഗേഷന്‍ ബ്യൂറോ സംഘം, ഡയരക്ടറേറ്റ് ജനറല്‍ ഓഫ് സിവില്‍ ഏവിയേഷന്‍, വിമാനത്താവള അതോറിറ്റി, ബോയിങ്, എയര്‍ഇന്ത്യ തുടങ്ങി വിവിധ വിഭാഗങ്ങളുടെ ഉന്നതതല സംഘം നേരത്തെ കരിപ്പൂരിലെത്തിയിരുന്നു.