കൊച്ചി: കേരളത്തിലെ മികച്ച കലാലയ മാഗസിനുള്ള കേരള മീഡിയ അക്കാദമി പുരസ്‌കാരത്തിന് കോഴിക്കോട് ഫാറൂഖ് കോളജ് മാഗസിന്‍ 'മറു' അര്‍ഹമായി. പൂക്കോട് ഗവ. വെറ്ററിനറി ആനിമല്‍ സയന്‍സ് കോളജിന്റെ മാഗസിന്‍ 'കുളി പ്രത്യയ'ത്തിനാണ് രണ്ടാംസ്ഥാനം. കോഴിക്കോട് ഗവ. മെഡിക്കല്‍ കോളജിന്റെ മാഗസിന്‍ 'ഒരു ദുരാത്മാവിന്റെ പറ്റുപുസ്തകം' മൂന്നാംസ്ഥാനം നേടി. തൃശൂര്‍ കേരള വര്‍മ്മ കോളജ് മാഗസിന്‍ 'സെക്കന്‍ഡ്‌സി'ന് പ്രോത്സാഹന സമ്മാനം ലഭിച്ചു.

ഒന്നാം സമ്മാനമായി മുഖ്യമന്ത്രിയുടെ ട്രോഫിയും 25,000 രൂപയും പ്രശസ്തി പത്രവുമാണ് സമ്മാനിക്കുകയെന്ന് മീഡിയ അക്കാദമി ചെയര്‍മാന്‍ ആര്‍.എസ് ബാബു അറിയിച്ചു. രണ്ടാം സമ്മാനമായി 15,000 രൂപയും ട്രോഫിയും നല്‍കുമ്പോള്‍ മൂന്നാംസ്ഥാനക്കാര്‍ക്ക് ലഭിക്കുക 10,000 രൂപയും ട്രോഫിയുമാണ്. ജൂണില്‍ കോഴിക്കോട് സംഘടിപ്പിക്കുന്ന ചടങ്ങില്‍ അവാര്‍ഡുകള്‍ സമ്മാനിക്കും.
പ്രമുഖ മാധ്യമ പ്രവര്‍ത്തകരായ തോമസ് ജേക്കബ്, ഡോ. പി.കെ രാജശേഖരന്‍, സാഹിത്യകാരി എസ്. സിതാര എന്നിവരടങ്ങിയ സമിതിയാണ് വിജയികളെ തെരഞ്ഞെടുത്തത്. കേരളത്തിലെ വിവിധ സര്‍വകലാശാലകളില്‍ അഫിലിയേറ്റ് ചെയ്തിട്ടുള്ള കോളജുകളിലെ 2017-18 ലെ മാഗസിനുകളാണ് അവാര്‍ഡിന് പരിഗണിച്ചത്.

അക്കാദമിയുടെ പുതിയ സംരംഭമായ സ്‌കൂളുകളിലെയും കോളജുകളിലെയും മീഡിയ ക്ലബ്ബ് പദ്ധതിയുടെ ഭാഗമാണ് മാഗസിന്‍ അവാര്‍ഡ്.