വിഴിഞ്ഞം: ഉച്ചക്കട പയറ്റുവിളയില്‍ ഒന്‍പതംഗ ഗുണ്ടാസംഘത്തിന്റെ ആക്രമണത്തില്‍ കൊല്ലപ്പെട്ട ബിജുകുമാറിന്റെ കൊലയാളികളായ ഏഴംഗ സംഘത്തെ പൊലിസ് കസ്റ്റഡിയില്‍ വാങ്ങി തെളിവെടുപ്പ് നടത്തി.
കൃത്യനിര്‍വ്വഹണത്തിന് ശേഷം പയറ്റുവിളക്ക് സമീപത്തെ പറമ്പിലേക്ക് വലിച്ചെറിഞ്ഞ മൂന്ന് വെട്ടുകത്തികള്‍ കണ്ടെടുത്തു.
വടിവാള്‍ ഒളിവില്‍ പോയ പ്രധാന പ്രതികള്‍ കടത്തിക്കൊണ്ടുപോയതായും പൊലിസ് സംശയിക്കുന്നു. നെയ്യാറ്റിന്‍കര ജയിലിലായിരുന്ന പ്രതികളെ കൂടുതല്‍ ചോദ്യം ചെയ്യാനും തെളിവെടുപ്പിനുമായി വ്യാഴാഴ്ച കസ്റ്റഡിയില്‍ വാങ്ങിയിരുന്നു.
എല്ലാ തയ്യാറെടുപ്പിന് ശേഷം ഇന്നലെ ഉച്ചക്ക് ശേഷമാണ് വന്‍ പൊലിസ് സംരക്ഷണയില്‍ തെളിവെടുപ്പിനായി സംഭവസ്ഥലത്ത് പ്രതികളെ കൊണ്ടുവന്നത്.ബിജുകുമാറിനെയും പെരിങ്ങമ്മല സ്വദേശി സതീശനെയും വെട്ടി വീഴ്ത്തിയതിന്റെ പിറ്റേ ദിവസം പിടിയിലായ പുന്നക്കുളംകുഴിവിളക്കോണം സ്വദേശിയും ഗുണ്ടാത്തലവനുമായ ബിനു (29),കൂട്ടാളികളായ മനോജ് (28), രാഹുല്‍ (21), ദീപു (20), ചന്തു (24), ശ്രീജിത് (25), ബിജു (40) എന്നിവരെയാണ് പയറ്റു വിളയിലും പ്രതികളുടെ വീടുകളിലും എത്തിച്ച് തെളിവെടുപ്പു നടത്തിയത്. സംഭവവുമായി ബന്ധപ്പെട്ട തെളിവെടുപ്പ് ഇന്നും തുടരും.
കണ്ടെത്താനുള്ള പ്രധാന പ്രതികള്‍ക്കായുള്ള അന്വേഷണം കൂടുതല്‍ ഊര്‍ജിതമാക്കിയതായി വിഴിഞ്ഞം സി.ഐ ഷിബു അറിയിച്ചു.