അലനല്ലൂര്‍: പാലക്കാഴി  വാക്കയില്‍കടവ്  ചിരട്ടക്കുളം റോഡിനോടുള്ള അധികൃതരുടെ അവഗണനയില്‍ പ്രതിഷേധിച്ച് നാട്ടുകാര്‍ വാക്കയില്‍കടവ് പാലത്തില്‍ റോഡ് ഉപരോധിച്ചു. നിര്‍മാണം പൂര്‍ത്തിയാക്കി വര്‍ഷങ്ങള്‍ കഴിഞ്ഞിട്ടും വെള്ളിയാര്‍ പുഴക്ക് കുറുകെ വാക്കയില്‍കടവില്‍ പാലത്തിനു സമീപം പാലക്കാഴികരയിലെ 50 മീറ്റര്‍ അപ്രോച്ച് റോഡ് ഗതാഗത യോഗ്യമല്ലാതെ കിടക്കുന്നതാണ് നാട്ടുകാരുടെ പ്രതിഷേധത്തിന് കാരണം.
ജില്ലാപഞ്ചായത്ത് നിര്‍മിച്ച പാലത്തിന്റെ ഇരുകരകളിലും റോഡ് അറ്റകുറ്റപ്പണി അടുത്തിടെയാണ് പൂര്‍ത്തിയാക്കിയത്. എന്നാല്‍ പാലത്തോട് ചേര്‍ന്ന 50 മീറ്റര്‍ ഭാഗം ഒഴിവാക്കിയിട്ടിരിക്കുകയാണ്. റോഡിന് ആവശ്യമായ ഡ്രൈനേജ് സംവിധാനമില്ലാത്തതും കുത്തനെയുള്ള ഇറക്കവും ഇവിടെ അപകടഭീഷണി ഉയര്‍ത്തുന്നു.
മഴക്കാലത്ത് ഈ റോഡ് ഗതാഗത്തിന് ഉപയോഗിക്കാന്‍ കഴിയാത്ത അവസ്ഥയാണിപ്പോള്‍. ചെളിനിറഞ്ഞ അപ്രോച്ച് റോഡില്‍ ക്വാറികളില്‍ നിന്നുള്ള കരിങ്കല്‍ ചീളുകള്‍ നിക്ഷേപിച്ചാണിപ്പോള്‍ യാത്ര.
പഞ്ചായത്തിലെ ഏറ്റവും പഴക്കം ചെന്ന റോഡാണിത്. കണ്ണംകുണ്ട് ക്രോസ്‌വേ മഴക്കാലത്ത് വെള്ളത്തിനിയിലാകുമ്പോഴും എടത്ത നാട്ടുകര  വട്ടമണ്ണപുറം  ചിരട്ടക്കുളം പ്രദേശത്തുകാര്‍ക്കും അലനല്ലൂരിലേക്കും തിരിച്ചും ഏറെ ദൈര്‍ഘ്യം കുറഞ്ഞ മാര്‍ഗമാണിത്.
ഈ റോഡിനോട് അ ധികൃതര്‍ നടത്തുന്ന അവഗണനയില്‍ നാട്ടുകാര്‍ ഏറെ പ്രതിഷേധത്തിലാണ്. വെള്ളിയാഴ്ച്ച രാവിലെ നടന്ന റോഡ് ഉപരോധസമരത്തിന് പുത്തം കോട്ട് സലീം, ടി.കെ. അബ്ദ, കാദര്‍ കൂത്താര്‍തൊടി, കുഞ്ഞയമ്മു ചേരിയാടന്‍, അബു കൂരിക്കാടന്‍, മമ്മദ് പള്ളിപ്പെറ്റ, ഹംസ കൂരിക്കാടന്‍, ഉമ്മര്‍ പൊന്‍പാറ നേതൃത്വം നല്‍കി.