കല്‍പറ്റ: മധ്യപ്രദേശ് മുന്‍ മുഖ്യമന്ത്രിയും കോണ്‍ഗ്രസ് നേതാവുമായ കമല്‍നാഥിന്റെ സ്ത്രീവിരുദ്ധ പ്രസ്താവനയോട് ഒരിക്കലും യോജിക്കാനാവില്ലെന്ന് രാഹുല്‍ ഗാന്ധി. വയനാട് സന്ദര്‍ശനത്തിനെത്തിയ രാഹുല്‍ കല്‍പറ്റയില്‍ മാധ്യമങ്ങളെ അഭിമുഖീകരിക്കവേയാണ് നിലപാട് വ്യക്തമാക്കിയത്.

''കമല്‍ നാഥ് എന്റെ പാര്‍ട്ടിക്കാരനാണെന്നതൊക്കെ ശരി. എന്നാല്‍ വ്യക്തിപരമായി, അദ്ദേഹം ഉപയോഗിച്ചതുപോലുള്ള ഭാഷ എനിക്കിഷ്ടമല്ല. അത്തരം പരാമര്‍ശങ്ങളെ അനുകൂലിക്കില്ല. അദ്ദേഹം ആരാണെന്നു നോക്കാതെ വിമര്‍ശിക്കും. ദൗര്‍ഭാഗ്യകരമായ പ്രസ്താവനയാണത്'- രാഹുല്‍ പറഞ്ഞു.

കോണ്‍ഗ്രസ് സ്ഥാനാര്‍ഥി സുരേഷ് രാജിന് വേണ്ടി ദാബ്രയില്‍ പ്രചാരണ റാലിയെ അഭിസംബോധന ചെയ്യവേയായിരുന്നു കമല്‍നാഥിന്റെ വിവാദ പരാമര്‍ശം.

'ഞങ്ങളുടെ സ്ഥാനാര്‍ഥി അവളെ പോലെയല്ല... അവളുടെ പേര് എന്താണ് നിങ്ങള്‍ക്ക് അവളെ നന്നായി അറിയാം, നേരത്തെ എനിക്ക് മുന്നറിയിപ്പ് നല്‍കേണ്ടതായിരുന്നു... എന്തൊരു ഐറ്റം ആണത്' - ഉപതെരഞ്ഞെടുപ്പിലെ ബി.ജെ.പി സ്ഥാനാര്‍ഥി ഇമാര്‍തി ദേവിയെ ലക്ഷ്യമിട്ടായിരുന്നു കമല്‍നാഥിന്റെ പരാമര്‍ശം.

വിവാദ പരാമര്‍ശത്തിന് പിന്നാലെ ബി.ജെ.പി തെരഞ്ഞെടുപ്പ് കമീഷന് പരാതി നല്‍കിയിരുന്നു. ഇതിനെത്തുടര്‍ന്ന് പരാമര്‍ശത്തില്‍ കേന്ദ്ര തെരഞ്ഞെടുപ്പ് കമീഷന്‍ വിശദ റിപ്പോര്‍ട്ട് തേടിയിരുന്നു. ഇത് സംബന്ധിച്ച് സോണിയാ ഗന്ധിക്കും ഇമാര്‍തി ദേവി പരാതി നല്‍കിയിരുന്നു.