കാബൂള്‍: കിഴക്കന്‍ അഫ്ഗാനിസ്ഥാനിലെ നാന്‍ഗര്‍ഹര്‍ പ്രവിശ്യയിലുണ്ടായ ചാവേര്‍ ആക്രമണത്തില്‍ കൊല്ലപ്പെട്ടവരുടെ എണ്ണം 68 ആയി. 165 പേര്‍ക്ക് പരുക്കേറ്റു. പ്രതിഷേധ പ്രകടനത്തിന് നേരെ ചൊവ്വാഴ്ചയാണ് ആക്രമണമുണ്ടായത്. സ്‌ഫോടനമുണ്ടാവുമ്പോള്‍ പ്രവിശ്യ തലസ്ഥാനമായ ജലാലാബാദിന്റെയും പാകിസ്താനുമായി അതിര്‍ത്തി പങ്കിടുന്ന പ്രദേശത്തിന്റെയും ഇടയിലെ പാത പ്രതിഷേധക്കാര്‍ ഉപരോധിച്ചിരുന്നു.
പ്രാദേശിക പൊലിസ് കമാന്‍ഡറെ നീക്കം ചെയ്യണമെന്നാവശ്യപ്പെട്ടാണ് ജനങ്ങള്‍ പ്രതിഷേധം നടത്തിയത്.
അഫ്ഗാനിസ്ഥാനില്‍ തീവ്രവാദികളുടെ ആക്രമണം വന്‍തോതില്‍ വര്‍ധിച്ചിരുന്നു. സ്‌പോര്‍ട്‌സ് ക്ലബില്‍ കഴിഞ്ഞ ബുധനാഴ്ചയുണ്ടായ ഇരട്ട സ്‌ഫോടനത്തില്‍ രണ്ട് മാധ്യമപ്രവര്‍ത്തകര്‍ ഉള്‍പ്പെടെ 20 പേര്‍ കൊല്ലപ്പെട്ടിരുന്നു.