കൊച്ചി: നല്ല പരിചരണം നല്‍കാന്‍ കളമശ്ശേരി മെഡിക്കല്‍ കോളജ് അധികൃതര്‍ പണം ആവശ്യപ്പെട്ടുവെന്ന ആരോപണവുമായി മരിച്ച കൊവിഡ് രോഗിയുടെ ബന്ധുക്കള്‍ രംഗത്ത്. മൂന്ന് മാസങ്ങള്‍ക്ക് മുമ്പ് കൊവിഡ് ബാധിച്ച് ചികിത്സയിലിരിക്കെ മരിച്ച എടത്തല സ്വദേശിയായ ബൈഹക്കിയുടെ (59) ബന്ധുക്കളാണ്ഗുരുതര ആരോപണവുമായി രംഗത്തെത്തിയത്.

പണം ആവശ്യപ്പെട്ട് ബൈഹക്കി സന്ദേശമയച്ചതായി ബന്ധുക്കള്‍ പറയുന്നു. നല്ല ശ്രദ്ധ വേണമെങ്കില്‍ പണം നല്‍കണമെന്ന് ബൈഹക്കി കരഞ്ഞു പറഞ്ഞു. 40,000 രൂപ നല്‍കിയാല്‍ ഡോക്ടര്‍മാരും നഴ്സുമാരും നന്നായി നോക്കുമെന്നാണ് അദ്ദേഹം പറഞ്ഞത്. പണം എത്തിക്കണമെന്നും ആവശ്യപ്പെട്ടു. 40,000 രൂപ ഒന്നിച്ചോ അല്ലെങ്കില്‍ 20,000 രൂപ വീതം രണ്ട് തവണയായോ എത്തിച്ച് നല്‍കണമെന്നാണ് ബൈഹക്കി ആവശ്യപ്പെട്ടിരുന്നത്. ബൈഹക്കിയെ വെന്റിലേറ്ററിലേക്ക് മാറ്റാന്‍ താമസിച്ചതായും ബന്ധുക്കള്‍ ആരോപിക്കുന്നു. ജൂലൈ മാസത്തിലാണ് കൊവിഡ് മൂലം ബൈഹക്കി മരിച്ചത്.

ജൂലായ് ഏഴിന് വൈകീട്ടാണ് ബൈഹക്കിക്ക് കൊവിഡ് സ്ഥിരീകരിച്ചത്. എട്ടാം തിയതി ആശുപത്രിയില്‍ പ്രവേശിപ്പിച്ചത്.