കൊടുങ്ങല്ലൂര്‍: കൊടുങ്ങല്ലൂര്‍ താലൂക്ക് ആശുപത്രിയില്‍ മാതൃശിശുചികിത്സാ വിഭാഗത്തില്‍ വൈദ്യുതിക്കായി കാത്തിരിപ്പ് തുടരുന്നു. ദേശീയ ആരോഗ്യ ദൗത്യം പദ്ധതിയുടെ ഭാഗമായി 11കോടി രൂപ ചിലവഴിച്ചു നിര്‍മിച്ച ബഹുനില കെട്ടിട നിര്‍മാണം പൂര്‍ത്തിയായി ഏഴ് മാസത്തോളമായിട്ടാണ് ഈ കാത്തിരിപ്പ് തുടരുന്നത്.
ലിഫ്റ്റ് ഉള്‍പ്പടെയുള്ള സൗകര്യങ്ങള്‍ തയാറായിക്കഴിഞ്ഞുവെങ്കിലും വൈദ്യുതി കണക്ഷന്‍ ലഭിക്കാത്തത് കെട്ടിടം തുറക്കാന്‍ തടസമാകുകയാണ്. രണ്ടു വിഭാഗങ്ങളിലായി നാലു ഡോക്ടര്‍മാരും അതിനുസരിച്ചുള്ള മറ്റ് ജീവനക്കാരും ആശുപത്രിയിലുണ്ട്. നേരത്തെ ഈ വിഭാഗം മാതൃശിശു ആശുപത്രിയായിട്ടാണ് പദ്ധതി തയ്യാറാക്കിയിരുന്നത്.
എന്നാല്‍ ജീവനക്കാരെ കൂടുതലായി നിയമിക്കാന്‍ കഴിയാത്ത സാഹചര്യത്തില്‍ പ്രത്യേക ആശുപത്രി എന്ന പദ്ധതി ഉപേക്ഷിക്കുകയായിരുന്നു. നിലവില്‍ രോഗികളുടെ ബാഹുല്യം കൊണ്ട് വീര്‍പ്പുമുട്ടുന്ന താലൂക്ക് ഗവ. ആശുപത്രിയില്‍ പുതിയ കെട്ടിടം തുറന്നാല്‍ ആശ്വാസകരമായിരിക്കും.
നവജാത ശിശുക്കള്‍ക്കുള്ള തീവ്രപരിചരണ വിഭാഗം, ഇന്‍ക്യുബേറ്റര്‍, ശസ്ത്രക്രിയ വിഭാഗം തുടങ്ങി ആധുനിക സജ്ജീകരണങ്ങളോടെ സ്വകാര്യ മേഖലയോട് കിടപിടിക്കുന്ന വിധത്തിലാണ് ഈ കെട്ടിടം ഒരുക്കിയിട്ടുള്ളത്.
കെട്ടിടത്തിലേക്കാവശ്യമായ ഉപകരണങ്ങള്‍ വാങ്ങുന്നതിനായി ദേശീയ ആരോഗ്യ ദൗത്യം രണ്ട് കോടി രൂപ അനുവദിച്ചിട്ടുണ്ട്. സാങ്കേതിക തടസങ്ങളുടെ പേരില്‍ കെട്ടിടത്തിന് വൈദ്യുതി കണക്ഷന്‍ ലഭിക്കുന്നത് വൈകും തോറും സാധാരണക്കാര്‍ക്ക് ലഭിക്കേണ്ടുന്ന വിദഗ്ധ ചികിത്സയാണ് നിഷേധിക്കപ്പെടുന്നത്.