മക്ക: ജറൂസലമിനെ ഇസ്‌റാഈല്‍ തലസ്ഥാനമായി അംഗീകരിച്ച രാജ്യങ്ങളുടെ നടപടി നിയമവിരുദ്ധവും ഉത്തരവാദിത്തമില്ലാത്തതുമാണെന്ന് മുസ്‌ലിം രാജ്യങ്ങളുടെ രാഷ്ട്രത്തലവന്മാര്‍. മക്കയില്‍ സമാപിച്ച ഒ.ഐ.സി ഉച്ചകോടി പുറത്തുവിട്ട സംയുക്ത പ്രസ്താവനയിലാണ് ഇങ്ങനെ പറഞ്ഞത്. തങ്ങളുടെ എംബസികള്‍ ജറൂസലമിലേക്കു മാറ്റിയ രാജ്യങ്ങള്‍ പുനരാലോചന നടത്തണമെന്നും അത്തരം രാജ്യങ്ങള്‍ക്കെതിരേ ഒ.ഐ.സി അംഗരാജ്യങ്ങള്‍ യോജിച്ച നടപടി സ്വീകരിക്കണമെന്നും പ്രസ്താവന ആവശ്യപ്പെട്ടു.
2017 ഡിസംബറില്‍ യു.എസ് പ്രസിഡന്റ് ഡൊണാള്‍ഡ് ട്രംപ് ജറൂസലമിനെ ഇസ്‌റാഈല്‍ തലസ്ഥാനമായി അംഗീകരിച്ചിരുന്നു. തുടര്‍ന്ന് 2018 മേയില്‍ യു.എസ് എംബസി ടെല്‍അവീവില്‍ നിന്ന് ജറൂസലമിലേക്ക് മാറ്റുകയും ചെയ്തു.
ഫലസ്തീനികളും ഇസ്‌റാഈലികളും ഒരുപോലെ തങ്ങളുടെ തലസ്ഥാനമായി കാണുന്ന സ്ഥലമാണ് ജറൂസലം. അതിനിടെയാണ് യു.എസ് ഇസ്‌റാഈല്‍ പക്ഷത്തേക്ക് മാറിയത്. ഫലസ്തീനികള്‍ക്ക് സ്വന്തം കാര്യം തീരുമാനിക്കാനും സ്വതന്ത്രപരമാധികാര രാജ്യം സ്ഥാപിക്കാനും അവകാശമുണ്ടെന്ന് ഉച്ചകോടി അംഗീകരിച്ച പ്രസ്താവന പറയുന്നു.
ഭീകരത സ്‌പോണ്‍സര്‍ ചെയ്യുന്ന രാജ്യങ്ങളുടെ പട്ടികയില്‍ നിന്ന് സുദാനെ ഒഴിവാക്കണമെന്ന് ഉച്ചകോടി യു.എസിനോട് ആവശ്യപ്പെട്ടു.