കല്‍പ്പറ്റ: രാഹുല്‍ഗാന്ധിയെ കാണണമെന്ന ആമിനയുടെ ആഗ്രഹം ഒടുവില്‍ സഫലമായി. വയനാട്ടിലെത്തിയ രാഹുല്‍ഗാന്ധിയെ കാണാന്‍ കൊല്ലം കരുനാഗപ്പള്ളിയില്‍ നിന്നാണ് ആമിനയെത്തിയത്. ദേശീയതലത്തില്‍ നീറ്റ് പരീക്ഷയില്‍ 1916ാം റാങ്ക് നേടിയ ആമിനയുടെ ആഗ്രഹം ഒടുവില്‍ സഫലമായി.
കല്‍പ്പറ്റ ഗസ്റ്റ് ഹൗസില്‍ വച്ച് ഇന്നലെ രാവിലെയായിരുന്നു ആമിനയും കുടുംബവും രാഹുല്‍ഗാന്ധിയെ കാണാനെത്തിയത്. ഇടതുകൈയുടെ താഴെ ഭാഗം നഷ്ടമായതിനാല്‍ എം.ബി.ബി.എസിന് പ്രവേശനം കിട്ടാത്ത കാര്യം രാഹുല്‍ഗാന്ധിയെ അറിയിച്ചതായും പ്രവേശനം ലഭ്യമാകുന്നതിനായി എല്ലാ ശ്രമങ്ങളും നടത്തുമെന്ന് രാഹുല്‍ഗാന്ധി അറിയിച്ചതായും ആമിന പറഞ്ഞു. കൃത്രിമ കൈവയ്ക്കാനുള്ള സാഹചര്യമുണ്ടെങ്കില്‍ അതിന് ശ്രമിക്കാമെന്നും അദ്ദേഹം ഉറപ്പ് നല്‍കിയതായും ആമിന കൂട്ടിച്ചേര്‍ത്തു. ആമിനയുടെ പഠന മികവ് പരിചയപ്പെടുത്തുന്നതിന്റെ ഭാഗമായി ദുബൈ എഫ്.എമ്മില്‍ നിന്നും ആര്‍.ജെ മിനി പത്മ വിളിച്ചിരുന്നു.
ഈയവസരത്തിലായിരുന്നു രാഹുല്‍ഗാന്ധിയെ കാണണമെന്ന ആഗ്രഹം പറയുന്നത്. പിന്നീട് കെ.എസ്.യു നേതാവ് മഞ്ജുകുട്ടന്‍, കോണ്‍ഗ്രസ് നേതാവ് സി.കെ മഹേഷ് എന്നിവര്‍ ചേര്‍ന്ന് ഷാഫി പറമ്പില്‍ എം.എല്‍.എയുടെ ശ്രദ്ധയില്‍ വിഷയമെത്തിക്കുകയും കെ.സി വേണുഗോപാല്‍ എം.പി മുഖേന രാഹുല്‍ഗാന്ധിയെ ആമിനയുടെ ആഗ്രഹം അറിയിക്കുകയുമായിരുന്നു. തന്റെ വയനാട് സന്ദര്‍ശനത്തില്‍ ആമിനയെ കാണാമെന്ന് രാഹുല്‍ ഉറപ്പ് നല്‍കുകയായിരുന്നു. പ്രിയങ്കാഗാന്ധിയുടെയും രാഹുല്‍ഗാന്ധിയുടെയും ചിത്രങ്ങള്‍ വച്ച ഫോട്ടോഫ്രെയിമും ആമിന രാഹുല്‍ ഗാന്ധിക്ക് സമ്മിനിച്ചു. കൊല്ലം കരുനാഗപ്പള്ളി ക്ലാപ്പന കുറ്റിപ്പറമ്പില്‍ ഷൗക്കത്തിന്റെയും ജാസ്മിന്റെയും രണ്ടു മക്കളില്‍ മൂത്തവളാണ് ആമിന. എസ്.എസ്.എല്‍.സി പരീക്ഷയില്‍ മുഴുവന്‍ വിഷയങ്ങള്‍ക്കും എപ്ലസ് വാങ്ങിയാണ് കൊല്ലം ക്ലാപ്പന ഹയര്‍ സെക്കന്‍ഡറി സ്‌കൂളില്‍ നിന്ന് ആമിന വിജയിച്ചത്. 90 ശതമാനം മാര്‍ക്ക് പ്ലസ്ടുവിനും ലഭിച്ചു.