കൊണ്ടോട്ടി: അബൂദബിയില്‍ നിന്ന് കരിപ്പൂര്‍ വഴികടത്താന്‍ ശ്രമിച്ച 92 ലക്ഷം രൂപയുടെ സ്വര്‍ണം ഡയറക്റ്ററേറ്റീവ് ഓഫ് റവന്യൂ ഇന്റലിജന്‍സ്(ഡി.ആര്‍.ഐ)സംഘം പിടികൂടി. കോഴിക്കോട് കുന്ദമംഗലം പുന്നക്കല്‍ മീത്തല്‍ മുസ്തഫയില്‍ (44) നിന്നാണ് 3.244 കിലോഗ്രാം സ്വര്‍ണം പിടികൂടിയത്. ഇന്നലെ രാവിലെ 8.45ന് അബൂദബിയില്‍നിന്നുളള ഇത്തിഹാദ് എയര്‍വേസ് വിമാനത്തിലാണ് ഇയാള്‍ കരിപ്പൂരിലെത്തിയത്.രഹസ്യ വിവരം ലഭിച്ചതിനെ തുടര്‍ന്ന് കോഴിക്കോട് നിന്നെത്തിയ ഡി.ആര്‍.ഐ സംഘം കരിപ്പൂരില്‍ വിമാനം ഇറങ്ങിയ ഉടനെ മുസ്തഫയെ കസ്റ്റഡിയിലെടുക്കുകയായിരുന്നു. പിന്നീട് ബാഗേജ് പരിശോധിച്ചപ്പോഴാണ് ഇതിനകത്തുണ്ടായിരുന്ന കാറിന്റെ ഇലക്ട്രിക് ഹൈഡ്രോളിക് ജാക്കിയിലും വോള്‍ട്ടേജ് കണ്‍വേര്‍ട്ടര്‍ ട്രാന്‍സ്‌ഫോര്‍മറിലും ഒളിപ്പിച്ച നിലയില്‍ സ്വര്‍ണം കണ്ടെടുത്തത്.ഒരു കിലോഗ്രാം തൂക്കമുളള മൂന്ന് സ്വര്‍ണക്കട്ടികളും 244 ഗ്രാമിന്റെ ഒരു സ്വര്‍ണക്കട്ടിയും 12 കഷണങ്ങളാക്കിയാണ് ഒളിപ്പിച്ചിരുന്നത്.