ചേളാരി: പ്രഗത്ഭ വാഗ്മിയും എഴുത്തുകാരനുമായിരുന്ന വി.പി സെയ്ത് മുഹമ്മദ് നിസാമി വൈജ്ഞാനിക രംഗത്ത് ചെയ്ത സേവനങ്ങള്‍ നിസ്തുലമായിരുന്നുവെന്ന് പാണക്കാട് സയ്യിദ് ഹൈദരലി ശിഹാബ് തങ്ങള്‍ അഭിപ്രായപ്പെട്ടു. കേരളീയ സാഹചര്യത്തില്‍ സമന്വയ വിദ്യാഭ്യാസത്തിന്റെ സുചിന്തിത മാതൃകകള്‍ സമ്മാനിക്കുന്നതില്‍ ബുദ്ധിയും ധിഷണയും സംഭാവന ചെയ്യുകയും വാഫി വഫിയ്യ നിര്‍മ്മിതിയില്‍ ശ്ലാഘനീയമായ പങ്കുവഹിക്കുകയും ചെയ്തയാളായിരുന്നു അദ്ദേഹമെന്നും തങ്ങള്‍ കൂട്ടിച്ചേര്‍ത്തു. വെളിമുക്ക് സി.പി ഓഡിറ്റോറിയത്തില്‍ കോഡിനേഷന്‍ ഓഫ് ഇസ്‌ലാമിക് കോളജസ് (സി.ഐ.സി) സംഘടിപ്പിച്ച നിസാമി അനുസ്മരണ സംഗമത്തില്‍ അധ്യക്ഷ പ്രഭാഷണം നിര്‍വഹിക്കുകയായിരുന്നു തങ്ങള്‍.
വാഫി പബ്ലിഷിങ് ബ്യൂറോ പുറത്തിറക്കിയ അന്‍പത് അറബി ബാലസാഹിത്യ കൃതികളുടെ പ്രകാശന കര്‍മവും തങ്ങള്‍ നിര്‍വഹിച്ചു. സി.ഐ.സി കോഡിനേറ്റര്‍ അബ്ദുല്‍ ഹക്കീം ഫൈസി ആദൃശേരി ആമുഖഭാഷണം നടത്തി.
പി.കെ കുഞ്ഞാലിക്കുട്ടി എം.പി സംഗമം ഉദ്ഘാടനം ചെയ്തു. വാഫി, വഫിയ്യ കോളജുകളിലെ വിദ്യാര്‍ഥികള്‍ പാരായണം ചെയ്ത ഖുര്‍ആന്‍ ഖത്മുകളുടെ പ്രാര്‍ഥന ചെറുവാളൂര്‍ ഹൈദ്രോസ് മുസ്‌ലിയാര്‍ നിര്‍വഹിച്ചു. മാണിയൂര്‍ ഉസ്താദ്, ചേലക്കാട് മുഹമ്മദ് മുസ്‌ലിയാര്‍, കെ.എ റഹ്മാന്‍ ഫൈസി, കെ.എസ് ഇബ്രാഹിം മുസ്‌ലിയാര്‍, പി.കെ മുഹമ്മദ് സാഹിബ് സംസാരിച്ചു. ഇ.ടി മുഹമ്മദ് ബഷീര്‍ എം.പി അനുസ്മരണ പ്രഭാഷണം നടത്തി.
ആനമങ്ങാട് മുഹമ്മദ് കുട്ടി ഫൈസി, കുഞ്ഞാമു ഫൈസി, ഹമീദ് ഫൈസി അമ്പലക്കടവ്, അലി ഫൈസി പാറല്‍, പി.എസ്.എച്ച് തങ്ങള്‍, ബി.എസ്.കെ തങ്ങള്‍, ഇബ്രാഹിം ഫൈസി പേരാല്‍, എം.കെ കൊടശേരി ഫൈസി, ഡോ. എന്‍.എ.എം അബ്ദുല്‍ ഖാദര്‍, സി.എം കുട്ടി സഖാഫി, സിദ്ദീഖ് നദ്‌വി ചേറൂര്‍, ജബ്ബാര്‍ ഹാജി, കരീം ഹാജി പട്ടാമ്പി, തിരുവട്ടൂര്‍ ഇബ്രാഹിം കുട്ടി, കെ.വി ഖാലിദ് ഹാജി ഖത്തര്‍, സി.പി അബ്ദുല്ല, പരീത്, സെയ്ത് മുഹമ്മദ് നിസാമിയുടെ മക്കളായ മുഹമ്മദ് ഇഖ്ബാല്‍, മുഹമ്മദ് ജാവിദ്, മുഹമ്മദ് ശജീഅ സംബന്ധിച്ചു.