ന്യൂഡല്‍ഹി: പൊതുഗതാഗത സംവിധാനത്തില്‍ സ്ത്രീകള്‍ക്ക് സൗജന്യ യാത്ര പ്രഖ്യാപിച്ച് ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍. ഡല്‍ഹി മെട്രോ, ബസ് എന്നിവയില്‍ പൂര്‍ണമായും സ്ത്രീകള്‍ക്ക് സൗജന്യമായി യാത്ര ചെയ്യാം.

പദ്ധതിക്ക് ബന്ധപ്പെട്ട അതോറിറ്റികളില്‍ നിന്ന് അനുമതി ലഭിച്ചുവെന്ന് കെജ്‌രിവാള്‍ പറഞ്ഞു. പ്രതിവര്‍ഷം 700 കോടി രൂപയാണ് ഇതിനായി നീക്കിവയ്ക്കുക.

എന്നാല്‍ ടിക്കറ്റെടുക്കാന്‍ സാധിക്കുന്ന സ്ത്രീകള്‍ക്ക് അങ്ങനെ ചെയ്യാമെന്നും അവര്‍ സബ്‌സിഡി നേടണമെന്നില്ലെന്നും അദ്ദേഹം പറഞ്ഞു.

സ്ത്രീ യാത്രക്കാര്‍ക്കുള്ള നിരക്ക് ഡല്‍ഹി മെട്രോയ്ക്കും ബസുകള്‍ക്കും സര്‍ക്കാര്‍ നല്‍കും.

2015 മുതല്‍ ഡല്‍ഹി ഭരിക്കുന്നത് കെജ്‌രിവാളിന്റെ നേതൃത്വത്തിലുള്ള എ.എ.പി സര്‍ക്കാരാണ്. സൗജന്യ വൈദ്യുതി അടക്കം നിരവധി ജനകീയ പദ്ധതികള്‍ സര്‍ക്കാര്‍ നടപ്പാക്കിയിരുന്നു.

കഴിഞ്ഞ ലോക്‌സഭാ തെരഞ്ഞെടുപ്പില്‍ ഏഴില്‍ ഏഴ് സീറ്റും ബി.ജെ.പി പിടിച്ചെടുത്തിരുന്നു.