ന്യൂഡല്‍ഹി: പാക് സേന വധിച്ച ജവാന്റെ വീട്ടില്‍ ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് സന്ദര്‍ശനം നടത്തി. പക്ഷെ, ജവാന്റെ കുടുംബത്തിന് കൂടുതല്‍ ദു:ഖവും അപമാനവും നല്‍കുന്നതായിരുന്നു യോഗിയുടെ സന്ദര്‍ശനം.

കൊല്ലപ്പെട്ട പ്രേം സാഗര്‍ എന്ന ജവാന്റെ വീട്ടില്‍ യോഗിയുടെ സന്ദര്‍ശനാര്‍ഥം വലിയ തരത്തില്‍ വി.ഐ.പി ഒരുക്കങ്ങള്‍ നടത്തി. എ.സിയും സോഫകളും കര്‍ട്ടനുകളും കാര്‍പറ്റും പ്രത്യേക കസേരകളും സജ്ജമാക്കി. വൈദ്യുതി തടസ്സം ഒഴിവാക്കുന്നതിനായി ജനറേറ്റര്‍ സംവിധാനവും ഒരുക്കി. പ്രാദേശിക ഭരണകൂടമാണ് ജവാന്റെ വീട്ടില്‍ എല്ലാം ഒരുക്കി നല്‍കിയത്.

25 മിനുട്ട് നേരം ചെലവഴിച്ച് മുഖ്യമന്ത്രി തിരിച്ചുപോയതിനു പിന്നാലെ എ.സി ഊരിയെടുത്തു. കൊണ്ടുവച്ച സാധനങ്ങളെല്ലാം തിരിച്ചെടുക്കുകയും ചെയ്തു. സംഭവം തങ്ങള്‍ക്ക് ഏറെ മനോവേദനയുണ്ടാക്കിയെന്ന് ജവാന്റെ സഹോദരന്‍ ദയ ശങ്കര്‍ പറഞ്ഞു.

[caption id="attachment_325455" align="aligncenter" width="630"] യോഗിയുടെ സന്ദർശനാർഥം എ.സി സ്ഥാപിച്ചപ്പോള്‍[/caption]

 

യു.പിയിലെ ഏറ്റവും ദരിദ്ര പ്രദേശങ്ങളിലൊന്നാണ് ജവാന്റെ വീടുള്ള ദിയോറിയ. യോഗി സന്ദര്‍ശിക്കുമെന്ന സന്ദേശം ലഭിച്ച പ്രാദേശിക ഭരണകൂടം ഒരു കുറവും വരുത്താതെ നോക്കുകയായിരുന്നു.

ജവാന്റെ വീട്ടിലേക്കുള്ള പൊട്ടിപ്പൊളിഞ്ഞ മണ്‍റോഡ് കോണ്‍ക്രീറ്റ് ചെയ്തു. ഗ്രാമം മുഴുവന്‍ വൃത്തിയാക്കുകയും അഴുക്കുചാലുകള്‍ നന്നാക്കുകയും ചെയ്തു. രാത്രികള്‍ പോലും ഒഴിവില്ലാതെയാണ് മുഖ്യമന്ത്രിക്കു വേണ്ടി ഒരുക്കങ്ങള്‍ നടത്തിയത്.

ജവാന്റെ കുടുംബത്തിന് മുഖ്യമന്ത്രി ആറു ലക്ഷം രൂപയുടെ ചെക്ക് നല്‍കിയിട്ടുണ്ട്. കൂടാതെ കുടുംബത്തിലെ ഒരംഗത്തിന് സര്‍ക്കാര്‍ ജോലിയും വാഗ്ദാനം ചെയ്തിട്ടുണ്ട്.

മെയ് ഒന്നിന് പൂഞ്ചിലാണ് ഹെഡ് കോണ്‍സ്റ്റബില്‍ പ്രേം സാഗര്‍ കൊല്ലപ്പെടുന്നത്. മൃതദേഹം വികൃതമാക്കിയ നിലയിലാണ് ഇദ്ദേഹത്തെ കണ്ടെത്തിയത്. ഇത് അന്താരാഷ്ട്ര തലത്തില്‍ വലിയ വിവാദങ്ങളുണ്ടാക്കിയിരുന്നു.

---