തൊടുപുഴ: കാട്ടാനകളുടെ കണക്കെടുപ്പ് 17 മുതല്‍ 19 വരെ നടക്കും. കണക്കെടുപ്പിന്റെ ഭാഗമായി  മറയൂര്‍, മൂന്നാര്‍ മേഖലയില്‍ പരിശീലനം പൂര്‍ത്തിയായതായി  മൂന്നാര്‍ വൈല്‍ഡ് ലൈഫ് വാര്‍ഡന്‍ ജി. പ്രസാദ് അറിയിച്ചു.
രാജ്യ വ്യാപകമായി കേന്ദ്ര വനം പരിസ്ഥിതി മന്ത്രാലയത്തിന് കീഴിലുള്ള പ്രൊജക്ട് എലിഫന്റ് ഡയറക്ടറേറ്റിന്റെ നേതൃത്വത്തിലാണ് പരിശീലനം നടക്കുന്നത്.  അഞ്ചു വര്‍ഷത്തെ ഇടവേളയ്ക്ക് ശേഷമാണ് കാട്ടാനകളുടെ കണക്കെടുപ്പ് നടക്കുന്നത്.
മൂന്നാര്‍ വൈല്‍ഡ് ലൈഫ് ഡിവിഷന്റെ കീഴിലുള്ള ഷോല നാഷാണല്‍ പാര്‍ക്കില്‍ ഒന്‍പത് ബ്‌ളോക്കുകള്‍, ഇരവികൂളം നാഷണല്‍ പാര്‍ക്കില്‍ ഏഴ് ബ്ലോക്കുകള്‍, ചിന്നാര്‍ വന്യജീവി സങ്കേതത്തില്‍ ഏഴ് ബ്ലോക്കുകള്‍ എന്നിങ്ങനെ 23 ബ്ലോക്കുകകളായാണ് കണക്കെടുപ്പ് നടത്തുന്നത്. വനം വകുപ്പ് ജീവനക്കാര്‍, വാച്ചര്‍മാര്‍, എന്‍ജിഒ എന്നിവരുള്‍പ്പെടുന്ന മൂന്നംഗ സംഘമാണ് മൂന്ന് ദിവസങ്ങളിലായി ഓരോ ബ്ലോക്കിലെയും കണക്കെടുപ്പ് നടത്തുന്നത്. ആദ്യത്തെ ദിവസം കാട്ടിലൂടെ പ്രത്യേകമായി തയാറാക്കിയിട്ടുള്ള ട്രാന്‍സെക്ടിലൂടെ നടന്ന് കാണുന്ന ആനകളുടെ കണക്ക് എടുക്കും. കൂടാതെ കൊമ്പന്‍മാരായ കാട്ടാനകളെ ആദ്യമായി പ്രത്യേകം നിരീക്ഷണം നടത്തുന്ന സെന്‍സസ് കൂടിയാണ് ഈ വര്‍ഷം നടക്കുന്നത്.
രണ്ടാം ദിവസം ആനപിണ്ഡങ്ങളുടെ കണക്കെടുക്കും. മൂന്നാംദിനം ഏറ്റവും കൂടുതല്‍ ആന വരുന്ന വഴികളിലും പ്രദേശത്തെ വാച്ച് ടവര്‍ പോലെയുള്ള സ്ഥലങ്ങളിലിരുന്നും ആനയെ വീക്ഷിക്കും.
പകല്‍ മാത്രമായിരിക്കും ആനയുടെ കണക്കെടുപ്പ് നടത്തുക.  മൂന്നാര്‍ വൈല്‍ഡ് ലൈഫ് വാര്‍ഡന്‍ ജി. പ്രസാദിന്റെ നേതൃത്വത്തില്‍ നടന്ന പരിശീലന പരിപാടികളില്‍ വൈല്‍ഡ് ലൈഫ് അസിസ്റ്റന്റ് സലീഷ്, കണ്‍സര്‍വേഷന്‍ ബയോളജിസ്റ്റ് ഡോ. രാജന്‍ പിലാക്കണ്ടി, ഹരീഷ് സുധാകര്‍, ബാവാധാസ് എന്നിവര്‍ ക്ലാസെടുത്തു.