പൊന്നാനി: ആതവനാട് മര്‍കസ് കോളജിലേക്ക് പരീക്ഷക്കെത്തിയ വിദൂര വിദ്യാഭ്യാസവിഭാഗം ബി.എ രണ്ടാം സെമസ്റ്റര്‍ വിദ്യാര്‍ഥികള്‍ക്ക് കാലിക്കറ്റ് സര്‍വകലാശാലയുടെ അലംഭാവം വിനയായി.
കോളജ് പരീക്ഷാ സെന്ററായി രേഖപ്പെടുത്തിയ ഹാള്‍ടിക്കറ്റ് സഹിതം ഉച്ചയ്ക്ക് കോളജില്‍ എത്തിയ വിദ്യാര്‍ഥികളോട് മര്‍കസ് കോളജ് അധികൃതര്‍ കൈമലര്‍ത്തി. പരീക്ഷക്കുള്ള സെന്റര്‍ അനുവദിക്കാന്‍ സര്‍വകലാശാലയില്‍നിന്ന് അറിയിപ്പ് ലഭിച്ചില്ലെന്നാണ് കോളജ് അധികൃതര്‍ വിദ്യാര്‍ഥികളെ അറിയിച്ചത്. വിവിധ കോളജുകളില്‍ നിന്നായി 106 വിദ്യാര്‍ഥികളാണ് പരീക്ഷക്കായി എത്തിയിരുന്നത്.
ഒടുവില്‍ വിദ്യാര്‍ഥികളും അധ്യാപകരും സര്‍വകലാശാല അധികൃതരുമായി ബന്ധപ്പെടുകയും ഒരു മണിക്കൂര്‍ വൈകിയിട്ടാണെങ്കിലും ആ കോളജില്‍ തന്നെ പരീക്ഷ എഴുതാനുള്ള അവസരം നല്‍കുകയുമായിരുന്നു. ഒരു മണിക്ക് തുടങ്ങേണ്ട പരീക്ഷ രണ്ടരയ്ക്കാണ് തുടങ്ങാനായത്. അപ്പോഴേക്കും സര്‍വകലാശാലയില്‍നിന്നു ചോദ്യപേപ്പറുകളുമെത്തി. സര്‍വകലാശാല പരീക്ഷാവിഭാഗത്തിന് സംഭവിച്ച പിഴവാണ് വിദ്യാര്‍ഥികളെ മാനസിക സംഘര്‍ഷത്തിലാക്കിയത്.നേരത്തെ, ബി.എ രണ്ടാം സെമസ്റ്ററുകാരുടെ അറബികിന്റെ ഒ.എം.ആര്‍ സൈറ്റില്‍ നല്‍കാനും സര്‍വകലാശാല മറന്നിരുന്നു. തുടര്‍ന്ന് വാര്‍ത്തയായതോടെ പരീക്ഷയുടെ തലേ ദിവസമാണ് ഒ.എം.ആര്‍ സൈറ്റില്‍ നല്‍കിയത്.