കേരളത്തില്‍നിന്ന് ഐ.എസ് കേന്ദ്രത്തിലേക്ക് യുവാക്കളെ എത്തിക്കുന്നതിലെ പ്രധാന കണ്ണി അബ്ദുല്‍ റാഷിദ് കൊല്ലപ്പെട്ടെന്ന്

തൃക്കരിപ്പൂര്‍: അഫ്ഗാനിലെ യു.എസ് ആക്രമണത്തില്‍ തൃക്കരിപ്പൂര്‍ സ്വദേശിയുള്‍പ്പെടെ പത്ത് ഇന്ത്യക്കാര്‍ കൊല്ലപ്പെട്ടതായി വിവരം. മരിച്ചവരില്‍ മൂന്ന് വനിതകളും നാലു കുട്ടികളും ഉള്‍പ്പെടും. 2016ല്‍ കാസര്‍കോട് ജില്ലയിലെ തൃക്കരിപ്പൂര്‍, പടന്ന മേഖലയില്‍നിന്ന് ദുരൂഹ സാഹചര്യത്തില്‍ കാണാതായവരില്‍പ്പെട്ട തൃക്കരിപ്പൂര്‍ ഉടുമ്പുന്തലയിലെ അബ്ദുല്‍ റാഷിദ് (40) ഒരു മാസം മുന്‍പ് അഫ്ഗാനിലെ ഖുറാസാനില്‍ കൊല്ലപ്പെട്ടതായാണ് വിവരം ലഭിച്ചത്. എന്നാല്‍ ഇക്കാര്യം ദേശീയ അന്വേഷണ ഏജന്‍സിയോ (എന്‍.ഐ.എ)ബന്ധുക്കളോ സ്ഥിരീകരിച്ചിട്ടില്ല. അഫ്ഗാനില്‍നിന്ന് ലഭിച്ച സന്ദേശത്തെ അടിസ്ഥാനമാക്കി ദേശീയ മാധ്യമങ്ങള്‍ ആണ് ഇക്കാര്യം റിപ്പോര്‍ട്ട് ചെയ്തത്. കേരളത്തില്‍നിന്ന് ഐ.എസ് കേന്ദ്രത്തിലേക്ക് യുവാക്കളെ എത്തിക്കുന്നതിലെ പ്രധാന കണ്ണിയാണ് അബ്ദുല്‍ റാഷിദെന്നാണ് പൊലിസ് പറയുന്നത്. നേരത്തെയും റാഷിദ് കൊല്ലപ്പെട്ടതായി വാര്‍ത്തകള്‍ വന്നിരുന്നു. എന്നാല്‍ ശബ്ദ സന്ദേശത്തോടെ ഇക്കാര്യം നിഷേധിച്ച് റാഷിദ് തന്നെ രംഗത്തെത്തിയിരുന്നു.

അബ്ദുല്‍ റാഷിദും ഭാര്യയും രണ്ടു മക്കളുമുള്‍പ്പെടെ 21 പേരാണ് 2016 ജൂണില്‍ മതപഠനത്തിനും ശ്രീലങ്കയില്‍ ബിസിനസ് ആവശ്യത്തിനുമായി പോകുന്നുവെന്ന് പറഞ്ഞു വീട് വിട്ടുപോയത്. ഇവര്‍ അഫ്ഗാനില്‍ ഐ.എസ് കേന്ദ്രത്തിലെത്തിയതായി കേന്ദ്ര സംസ്ഥാന രഹസ്യാന്വേഷണ വിഭാഗങ്ങളും എന്‍.ഐ.എയും പറഞ്ഞിരുന്നു. സംഘത്തില്‍പെട്ട ഹഫീസുദ്ദീന്‍, ഷിഹാസ്, മന്‍ഷാദ്, സാജിദ്, പാലക്കാട് സ്വദേശി യഹിയ എന്നിവര്‍ മുന്‍പ് കൊല്ലപ്പെട്ടതായി വിവരം ലഭിച്ചിരുന്നു. ഇവരുടെ മരണ വിവരങ്ങള്‍ റാഷിദാണ് ടെലിഗ്രാം സന്ദേശം വഴി ബന്ധുക്കള്‍ക്ക് നല്‍കിയിരുന്നത്.
കൊല്ലപ്പെട്ടുവെന്ന് കരുതുന്ന റാഷിദിനെ കൂടാതെ ഭാര്യ എറണാകുളം വെറ്റില സ്വദേശിനി ആയിഷ (സോണി സെബാസ്റ്റ്യന്‍ -25), മകള്‍ രണ്ടു വയസുകാരി സാറ, പടന്നയിലെ ഡോ. പി.കെ ഇജാസ് (35), ഭാര്യ പടന്നക്കാട് സ്വദേശിനി ഡോ. ജസീല (26), രണ്ടു വയസുകാരനായ മകന്‍ അനാന്‍, ഇജാസിന്റെ സഹോദരന്‍ പി.കെ ശിഹാസ് (28), ഭാര്യ മംഗളുരു ഉള്ളാള്‍ സ്വദേശിനി അജ്മല (20), തൃക്കരിപ്പൂര്‍ മൈതാനിയിലെ മുഹമ്മദ് മന്‍ഷാദ് (25), തൃക്കരിപ്പൂരിലെ കെ.വി.പി മര്‍വാന്‍ (23), പടന്ന ആശുപത്രിക്ക് സമീപമുള്ള ഹഫീസുദ്ദീന്‍ (28), പടന്ന പെട്രോള്‍ പമ്പിന് സമീപത്തെ പി.കെ അഷ്ഫാഖ് (30), ഭാര്യ ഉദിനൂര്‍ പരിത്തിച്ചാലിലെ ഷംസിയ (24), ഒന്നര വയസുള്ള മകള്‍ ആയിഷ, തൃക്കരിപ്പൂര്‍ മൈതാനിയിലെ ഫിറോസ് (25), പടന്ന വടക്കെപ്പുറത്തെ മുര്‍ഷിദ് മുഹമ്മദ് (25), കാവുന്തലയിലെ സാജിദ് (26), പാലക്കാട് സ്വദേശികളായ ഈസ, യഹിയ ഇവരുടെ ഭാര്യമാരായ ആയിഷ, മറിയം എന്നിവരുള്‍പ്പെടെ 21 പേരാണ് ഒരേ സമയം വീടുവിട്ടത്.