കാഞ്ഞങ്ങാട്: മാനസികമായി പക്വത ഇല്ലാത്ത വിദ്യാര്‍ഥികളെ കണ്ടെത്തി അവരുടെ മതപഠന നിലവാരം ഉയര്‍ത്തുന്നതിനു വേണ്ടി സമസ്ത കേരള ജംഇയ്യത്തുല്‍ മുഅല്ലിമീന്‍ ആവിഷ്‌കരിച്ച സംയോജന വിദ്യാഭ്യാസ പദ്ധതിയുടെ ഭാഗമായ ഇന്‍സൈറ്റ് തികച്ചും കാലാനുസൃതമാണെന്നും സമുദായം അത് ഏറ്റെടുക്കാന്‍ മുന്നോട്ടു വരണമെന്നും സമസ്ത ജില്ലാ ജനറല്‍ സെക്രട്ടറി യു.എം അബ്ദുല്‍ റഹിമാന്‍ മൗലവി പറഞ്ഞു. സമസ്ത കേരള ജംഇയ്യത്തുല്‍ മുഅല്ലിമീന്‍ ജില്ലയില്‍ നടപ്പാക്കുന്ന ഇന്‍സൈറ്റ് സംയോജിത വിദ്യാഭ്യാസ പദ്ധതിയുടെ പ്രഖ്യാപന ചടങ്ങ് കാഞ്ഞങ്ങാട് സംയുക്ത മുസ്‌ലിം ജമാഅത്ത് ഹാളില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ജില്ലയില്‍ എണ്‍പതിനായിരത്തിലധികം വരുന്ന വിദ്യാര്‍ഥികള്‍ക്ക് മതപരമായ പഠനങ്ങള്‍ നടത്തി കൊടുക്കുന്ന മുഅല്ലിമീങ്ങള്‍ ഇതിന്റെ പ്രാധാന്യം ഉള്‍ക്കൊള്ളണം. മതപരമായ അറിവുകള്‍ നേടിയെടുക്കാന്‍ എത്തുന്ന വിദ്യാര്‍ഥികള്‍ക്കുവേണ്ട സൗകര്യങ്ങള്‍ ചെയ്തു കൊടുക്കേണ്ടത് സമൂഹത്തിന്റെ ബാധ്യതയാണെന്നും കാഴ്ചയും കേള്‍വിയും എല്ലാം ചോദ്യം ചെയ്യപ്പെടുമെന്ന് വിശ്വസിക്കുന്ന മുസ്‌ലിമിനു ഇത്തരം ബാധ്യതകളില്‍നിന്ന് ഒരിക്കലും ഒഴിഞ്ഞു മാറാനാവില്ലെന്നും അദ്ദേഹം പറഞ്ഞു.
27 റെയ്ഞ്ചുകളില്‍ നിന്നുള്ള അംഗങ്ങള്‍ ചടങ്ങില്‍ സംബന്ധിച്ചു. സമസ്ത കേരള ജംഇയ്യത്തുല്‍ ഉലമാ കേന്ദ്ര മുശാവറ അംഗമായി തെരഞ്ഞെടുക്കപ്പെട്ട നീലേശ്വരം ഖാസി ഇ.കെ മഹ്മൂദ് മുസ്‌ലിയാരെ ചടങ്ങില്‍ ആദരിച്ചു. ജംഇയ്യത്തുല്‍ മുഅല്ലിമീന്‍ ജില്ലാ പ്രസിഡന്റ് ടി.പി അലി ഫൈസി അധ്യക്ഷനായി. ബാസിം ഗസാലി ഇന്‍സൈറ്റ് പ്രോഗ്രം അവതരിപ്പിച്ചു.പദ്ധതിയുടെ മേല്‍നോട്ടത്തിനായി ഒരു സ്റ്റിയറിങ് കമ്മിറ്റിയും കീഴില്‍ ഒരു കോര്‍ഡിനേഷന്‍ കമ്മിറ്റിയും ജില്ലയില്‍ രൂപീകരിക്കും.
സയ്യിദ് ഹുസൈന്‍ തങ്ങള്‍ മാസ്തിക്കുണ്ട്, ലത്തീഫ് മൗലവി ചെര്‍ക്കള, ഹാഷിം ദാരിമി ദേലംപാടി,നൂറുദ്ദിന്‍ മൗലവി കുന്നുംകൈ, കണ്ണൂര്‍ അബ്ദുല്ല മാസ്റ്റര്‍, മുഹമ്മദ് ഫൈസി കജ, എം.എ.സി കുഞ്ഞബ്ദുല്ല ഹാജി, മുബാറക് ഹസൈനാര്‍ ഹാജി, കെ.യു ദാവൂദ് ഹാജി ചിത്താരി തുടങ്ങിയവര്‍ ചടങ്ങില്‍ സംബന്ധിച്ചു.