കാസര്‍കോട്: ചട്ടഞ്ചാല്‍ മാഹിനാബാദില്‍ ടാറ്റ കമ്പനി സൗജന്യമായി സംസ്ഥാന സര്‍ക്കാരിന് നിര്‍മിച്ചു നല്‍കിയ കൊവി ഡ് ആശുപത്രി ബുധനാഴ്ച പ്രവര്‍ത്തനം തുടങ്ങും. ആരോഗ്യ വകുപ്പ് മന്ത്രി കെ.കെ.ശൈലജയാണ് ഇന്നലെ ഇക്കാര്യം വ്യക്തമാക്കിയത്.
ജില്ലയില്‍ കൊവി ഡ് ബാധിതരുടെ എണ്ണം സംസ്ഥാന തലത്തില്‍ തന്നെ ഏറ്റവും കൂടുതല്‍ രേഖപ്പെടുത്തപ്പെട്ടിരുന്ന ഇക്കഴിഞ്ഞ ഏപ്രിലിലാണ് ടാറ്റ കമ്പനി 540 ബെഡുകള്‍ ഉള്ള ആശുപത്രി സൗജന്യമായി നിര്‍മിച്ചു നല്‍കാന്‍ മുന്നിട്ടിറങ്ങിയത്. മാഹിനാബാദില്‍ മലബാര്‍ ഇസ്‌ലാമിക് കോംപ്ലക്‌സിന്റെ കീഴിലുണ്ടായിരുന്ന ഭൂമി ആശുപത്രി പണിയുന്നതിന് വേണ്ടി വിട്ടു നല്‍കിയിരുന്നു. തുടര്‍ന്ന് റവന്യൂ വകുപ്പിന്റെ കീഴിലുണ്ടായിരുന്ന 1.15 ഏക്കര്‍ സ്ഥലം കൂടി ഉള്‍പ്പെടുത്തി അഞ്ചേക്കര്‍ ഭൂമിയിലാണ് മൂന്നു മാസത്തിനകം കണ്ടെയ്‌നര്‍ മൊഡ്യൂള്‍ ആശുപത്രി നിര്‍മാണം പൂര്‍ത്തിയാക്കിയത്. നിര്‍മാണം പൂര്‍ത്തിയായി സെപ്റ്റംബര്‍ ആദ്യ വാരത്തില്‍ തന്നെ സര്‍ക്കാരിന് കൈമാറിയെങ്കിലും പ്രവര്‍ത്തനം തുടങ്ങിയിരുന്നില്ല. ഇതേ തുടര്‍ന്ന് വിവിധ കോണുകളില്‍ നിന്നും പ്രതിഷേധം ശക്തമായിരുന്നു. 65 ലക്ഷം രൂപ ചെലവിട്ടാണ് ടാറ്റ കമ്പനി നിര്‍മാണം പൂര്‍ത്തിയാക്കിയത്. ആശുപത്രിയില്‍ പൂര്‍ണമായും ശീതീകരിച്ച ആശുപത്രിയില്‍ രോഗികള്‍ക്ക് ആവശ്യമായ കട്ടില്‍ ഉള്‍പ്പെടെയുള്ള ഫര്‍ണിച്ചറുകളും ടാറ്റ കമ്പനി അധികൃതര്‍ തന്നെ സൗജന്യമായി നല്‍കിയിരുന്നു.
ആശുപത്രി പ്രവര്‍ത്തനം തുടങ്ങുന്നതോടെ കൊവി ഡ് ചികിത്സാ രംഗത്ത് ജില്ലയില്‍ കൂടുതല്‍ സൗകര്യങ്ങള്‍ ഉണ്ടാകുമെന്ന പ്രതീക്ഷയിലാണ് ജനങ്ങള്‍.ആശുപത്രിയില്‍ 190 ഓളം വരുന്ന ജീവനക്കാരെ നിയമിക്കാന്‍ സര്‍ക്കാര്‍ മുന്‍പ് തീരുമാനിച്ചിരുന്നു.