മലപ്പുറം: സംസ്ഥാനത്തെ ഏറ്റവും വലിയ ഹജ്ജ് പഠന ക്യാംപിന് പൂക്കോട്ടൂര്‍ ഖിലാഫത്ത് കാംപസില്‍ ഒരുക്കങ്ങള്‍ തുടങ്ങി. ദ്വിദിന ക്യാംപ് 20 ന് ശനിയാഴ്ച രാവിലെ തുടങ്ങും. 21 ന് ഞായറാഴ്ച വൈകിട്ട് നാലിനു പ്രാര്‍ഥനാ സമ്മേളനത്തോടെ സമാപിക്കും. ഹജ്ജിന്റെ കര്‍മ ശാസ്ത്ര നിയമങ്ങളും കര്‍മങ്ങളുടെ പ്രായോഗിക രീതിയും പ്രധാന ചരിത്രസ്ഥലങ്ങളുടെ ശ്രേഷ്ഠതയും വിശദമാക്കുന്ന ക്യാംപിനു എസ്.വൈ.എസ് സംസ്ഥാന സെക്രട്ടറിയും വാഗ്മിയുമായ അബ്ദുസ്സമദ് പൂക്കോട്ടൂര്‍ നേതൃത്വം നല്‍കും. സംസ്ഥാന ഹജ്ജ് കമ്മിറ്റിക്ക് കീഴിലും സ്വകാര്യ ഗ്രൂപ്പുകള്‍ വഴിയും തീര്‍ഥാടനം നടത്തുന്നവര്‍ക്ക് വേണ്ടി 17 വര്‍ഷമായി സംഘടിപ്പിക്കുന്ന ഏറ്റവും വലിയ ഹജ്ജ് പഠന ക്യാംപാണിത്. കഅ്ബ, ഹിജ്‌റ് ഇസ്മാഈല്‍, ജംറ തുടങ്ങി ഹജ്ജ് തീര്‍ഥാടനത്തിലെ പ്രധാന സ്ഥലങ്ങളുടെയും കര്‍മങ്ങളുടെയും പ്രായോഗിക പരിശീലനത്തിന് മാതൃകകളും ഡിജിറ്റല്‍ സംവിധാനവും രൂപപ്പെടുത്തിയാണ് ക്യാംപ് ഒരുക്കിയിരിക്കുന്നത്. മുഴുവന്‍ ക്യാംപ് അംഗങ്ങള്‍ക്കും ഒരു പോലെ ദൃശ്യമൊരുക്കാന്‍ സര്‍ക്യൂട്ട് ടെലിവിഷന്‍ കണക്ഷനുകള്‍ ക്യാംപ് ഹാളില്‍ സജ്ജീകരിക്കും. വിദഗ്ധ മെഡിക്കല്‍ സംഘത്തിന്റെ സൗജന്യ സേവനവും ക്യാംപില്‍ ലഭിക്കും.
പതിനായിരത്തോളം തീര്‍ഥാടകരാണ് ഇരുദിവസങ്ങളിലെ ക്യാംപില്‍ സംബന്ധിക്കുന്നത്. ഇവരുടെ താമസം, ഭക്ഷണം, മെഡിക്കല്‍ ശുശ്രൂഷ എന്നിവ സൗജന്യമാണ്. ക്യാംപിന് മുന്നോടിയായി 19 ന് വെള്ളിയാഴ്ച നഗരിയില്‍ പ്രാര്‍ഥനാ സദസ് നടക്കും. സയ്യിദ് മാനു തങ്ങള്‍ നേതൃത്വം നല്‍കും. സിംസാറുല്‍ ഹഖ് ഹുദവി പ്രഭാഷണം നടത്തും. 20 നു രാവിലെ ക്യാംപ് ഉദ്ഘാടനം നടക്കും.
സാദാത്തുക്കളും പ്രമുഖ പണ്ഡിതരും ജനപ്രതിനിധികളും പങ്കെടുക്കും. 21 ന് വൈകിട്ട് നാലിനു പ്രാര്‍ഥനാ സമ്മേളനത്തോടെ സമാപിക്കും. ക്യാംപില്‍ താമസ സൗകര്യത്തിന് തീര്‍ഥാടകരുടെ രജിസ്‌ട്രേഷന്‍ തുടങ്ങി. വിദൂര സ്ഥലങ്ങളില്‍ നിന്നുള്ളവര്‍ക്ക് താമസത്തിന് 0483 2771819, 9895848826, 9446883001 എന്നീ നമ്പറുകളില്‍ ബന്ധപ്പെടണമെന്ന് ഓഫിസില്‍ നിന്ന് അറിയിച്ചു.