റിയാദ്: സഊദിയിലെ നാട് കടത്തൽ കേന്ദ്രത്തിൽ കഴിഞ്ഞിരുന്ന തടവുകാരിൽ 356 പേർ കൂടി നാട്ടിലേക്ക് മടങ്ങി. ഇന്ത്യൻ എംബസിയുടെ ശ്രമഫലമായാണ് ഇവരെ പ്രത്യേക വിമാനത്തിൽ ചൊവ്വാഴ്ച റിയാദ് അന്താരാഷ്ട്ര വിമാനത്താവളത്തിൽ നിന്നും ഡൽഹിയിലേക്ക് യാത്രയാക്കിയത്. നിയമ ലംഘകരായി സഊദി ജയിലുകളിൽ കഴിഞ്ഞിരുന്ന വിവിധ സംസ്ഥാനക്കാരാണ് ഇന്നത്തെ സംഘത്തിലുള്ളത്. ഇവരിൽ പതിനാലു പേർ മലയാളികളാണ്. 383 യാത്രാ സൗകര്യം ലഭ്യമായെങ്കിലും എട്ടു പേർക്ക് നിയമ പ്രശ്‌നങ്ങൾ മൂലം യാത്ര മടങ്ങുകയായിരുന്നു.

    ഉത്തർപ്രദേശ്​ (200), പശ്ചിമ ബംഗാൾ (47), ബിഹാർ (32), രാജസ്​ഥാൻ (20), പഞ്ചാബ്​ (17), തമിഴ്​നാട്​, തെലങ്കാന, ത്രിപുര (11 വീതം), ഹിമാചൽ പ്രദേശ്​, ജമ്മു, ജാർക്കണ്ഡ്​ (ഒമ്പത്​ വീതം), ആ​ന്ധ്ര, ഗോവ,ഗുജറാത്ത്​, ഹരിയാന (എട്ട്​ വീതം), ​അസം (ഏഴ്)​, കർണാടക, മഹാരാഷ്​ട്ര, മധ്യപ്രദേശ്​ (അഞ്ച്​) എന്നീ സംസ്​ഥാനങ്ങളിൽ നിന്നുള്ളവരാണ് മറ്റുള്ളവർ. വിമാനമിറങ്ങി ഇവിടെ ക്വാറന്റീൻ പൂർത്തിയാക്കിയ ശേഷമായിരിക്കും സ്വന്തം നാടുകളിലേക്ക് ഇവർ മടങ്ങുക. സഊദി സർക്കാർ ചെലവിലാണ് സംഘം നാട്ടിലേക്ക് മടങ്ങിയത്. റിയാദ്​ ഇസ്​കാനിലെ തർഹീലിൽ നിന്ന്​ ഇന്ത്യൻ എംബസി ഉദ്യോഗസ്​ഥരായ രാജേഷ്​ കുമാർ, യൂസഫ്​ കാക്കഞ്ചേരി, റനീഫ്​ കണ്ണൂർ എന്നിവരുടെ നേതൃത്വത്തിൽ എയർപോർട്ടിൽ എത്തിച്ച്​ യാത്രയാക്കിയത്. ഇവർക്ക് ഇന്ത്യൻ എംബസി പ്രത്യേക ടീ ഷർട്ടുകളും നൽകിയിരുന്നു.

    ജിദ്ദയിലും റിയാദിലുമായി തര്‍ഹീലുകളില്‍ നിരവധി  ഇന്ത്യക്കാരായിരുന്നു ഉണ്ടായിരുന്നത്. നേരത്തെ കുറച്ചാളുകളെ ഹൈദരാബാദിൽ എത്തിച്ചിരുന്നു. അതിന് ശേഷം ഇന്ത്യയില്‍ കൊവിഡ് രൂക്ഷമാവുകയും വിമാന സര്‍വീസിന് അനുമതി ലഭിക്കാതെയുമായി. ഇതോടെയാണ് ഇവരെ നാട്ടിലെത്തിക്കല്‍ അനിശ്ചിതമായി നീണ്ടത്.  കൊവിഡ് പ്രതിസന്ധിക്ക് ശേഷം പുറപ്പെടുന്ന നാലാമത്തെ ബാച്ചാണ് ചൊവ്വാഴ്ച പുറപ്പെട്ടത്. നിലവിൽ നൂറിൽ താഴെ പേർ മാത്രമാണ് റിയാദ് തർഹീലിൽ കഴിയുന്നത്.